سیدنا فضالہ بن عبید رضی اللہ عنہ بیان کرتے ہیں کہ انہوں نے نبی اکرم صلی اللہ علیہ وسلم کے ہمراہ غزوہ تبوک میں شرکت کی تو سواریاں انتہائی لاغر ہو گئیں، لوگوں نے اس بات کی شکایت نبی اکرم صلی اللہ علیہ وسلم سے کی کہ ان کی سواریاں لاغر ہو گئی ہیں، تو نبی اکرم صلی اللہ علیہ وسلم نے انہیں ایک تنگ راستے سے گزرنے کا حکم دیا، لوگ وہاں سے گزرے تو نبی اکرم صلی اللہ علیہ وسلم یہ فرما رہے تھے: ”اللہ کا نام لیتے ہوئے گزر جاؤ۔“ آپ صلی اللہ علیہ وسلم ان کی سواریوں پر پھونک مارتے تھے اور یہ کہہ رہے تھے: «اللَّهُمَّ احْمِلْ عَلَيْهَا فِي سَبِيلِكَ، فَإِنَّكَ تَحْمِلُ عَلَى الْقَوِيِّ وَالضَّعِيفِ، وَالرَّطْبِ وَالْيَابِسِ فِي الْبَرِّ وَالْبَحْرِ» ”اے اللہ! اپنی راہ میں اس پر سواری کو آسان کر دے کیونکہ تو ہی طاقتور اور کمزور، تر اور خشک پر، خشکی اور سمندر میں سواری فراہم کرتا ہے۔“ سیدنا فضالہ رضی اللہ عنہ بیان کرتے ہیں کہ جب ہم لوگ مدینہ منورہ پہنچے تو ہمارے لیے ان سواریوں پر قابو پانا مشکل ہو رہا تھا (یعنی وہ تیزی سے چل رہی تھیں)، تو میں نے یہ سوچا کہ طاقتور اور کمزور کے بارے میں یہ نبی اکرم صلی اللہ علیہ وسلم کی دعا کا نتیجہ ہے لیکن خشک اور تر کے بارے میں کیا صورت ہو سکتی ہے؟ پھر جب ہم شام آئے اور ہم نے جنگِ قبرص میں شرکت کی اور میں نے بڑی (جنگی کشتیاں) دیکھیں، تو مجھے اندازہ ہوا کہ یہ نبی اکرم صلی اللہ علیہ وسلم کی دعا کا نتیجہ ہے۔ [صحیح ابن حبان/كِتَابُ السِّيَرِ/حدیث: 4681]