سیدنا ابوموسیٰ اشعری رضی اللہ عنہ بیان کرتے ہیں کہ ہم نبی اکرم صلی اللہ علیہ وسلم کے ہمراہ ایک جنگ میں حصہ لینے کے لیے روانہ ہوئے، ہم دو آدمیوں کے لیے ایک اونٹ ہوتا تھا جس پر ہم باری باری سوار ہوتے تھے۔ راوی بیان کرتے ہیں کہ ہمارے پاؤں زخمی ہو گئے، میرے بھی دونوں پاؤں زخمی ہو گئے اور میرے ناخن گر گئے، ہم اپنے پاؤں پر چیتھڑے لپیٹا کرتے تھے۔ راوی بیان کرتے ہیں کہ اس لیے اس جنگ کا نام «ذَاتُ الرِّقَاعِ» رکھا گیا کیونکہ ہم اپنے پاؤں پر چیتھڑے لپیٹا کرتے تھے۔ ابوبردہ بیان کرتے ہیں کہ سیدنا ابوموسیٰ اشعری رضی اللہ عنہ نے یہ حدیث بیان کی پھر انہیں یہ بات اچھی نہیں لگی اور انہوں نے فرمایا: مجھے یہ حدیث ذکر نہیں کرنی چاہیے تھی۔ راوی بیان کرتے ہیں کہ انہوں نے اس بات کو اس لیے ناپسند کیا تاکہ ان کے عمل میں سے کوئی چیز ظاہر نہ ہو۔ [صحیح ابن حبان/كِتَابُ السِّيَرِ/حدیث: 4734]