سیدنا سعد بن ابی وقاص رضی اللہ عنہ سے روایت ہے کہ ان سے ایک قسم کے جو کی دوسری قسم کے جو کے عوض فروخت کے بارے میں دریافت کیا گیا تو انہوں نے بتایا: میں نے نبی اکرم صلی اللہ علیہ وسلم کو سنا کہ آپ صلی اللہ علیہ وسلم سے تر کھجور کے عوض خشک کھجور کا سودا کرنے کے بارے میں دریافت کیا گیا، تو آپ صلی اللہ علیہ وسلم نے دریافت فرمایا: ”کیا تر کھجور سوکھنے پر کم نہیں ہو جاتی؟“ لوگوں نے عرض کیا: جی ہاں! تو نبی اکرم صلی اللہ علیہ وسلم نے فرمایا: ”پھر ایسا نہیں ہو گا (یعنی یہ درست نہیں ہو گا)۔“ (امام ابن حبان رحمہ اللہ فرماتے ہیں:) اس سے مراد یہ ہے: تر جو کو خشک جو کے عوض میں فروخت کیا جائے۔ [صحیح ابن حبان/كِتَابُ البُيُوعِ/حدیث: 4997]