سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم کی خدمت میں دودھ پیش کیا گیا جس میں پانی ملایا گیا تھا، آپ صلی اللہ علیہ وسلم کے دائیں طرف ایک دیہاتی بیٹھا ہوا تھا اور بائیں طرف سیدنا ابوبکر رضی اللہ عنہ موجود تھے۔ نبی اکرم صلی اللہ علیہ وسلم نے اسے پی لیا پھر آپ صلی اللہ علیہ وسلم نے دیہاتی کو دیتے ہوئے ارشاد فرمایا: ”دائیں طرف والے کا حق پہلے ہے۔“ (امام ابن حبان رحمہ اللہ فرماتے ہیں:) یہ دونوں فعل دو مختلف مواقع کے ہیں اور اس بات کی دلیل وہ ہے جو سیدنا سہل بن سعد رضی اللہ عنہ کے حوالے سے منقول روایت میں مذکور ہے کہ آپ صلی اللہ علیہ وسلم کی خدمت میں مشروب پیش کیا گیا اور آپ صلی اللہ علیہ وسلم کے دائیں طرف ایک لڑکا تھا، تو نبی اکرم صلی اللہ علیہ وسلم نے اس سے اجازت لی کہ آپ صلی اللہ علیہ وسلم اپنے بچے ہوئے حصے کو اس کی بجائے دوسرے کو دیں، جبکہ سیدنا انس رضی اللہ عنہ سے منقول روایت میں یہ بات مذکور ہے کہ دودھ پیش کیا گیا جس میں پانی ملا ہوا تھا اور نبی اکرم صلی اللہ علیہ وسلم کے دائیں طرف دیہاتی تھا، نبی اکرم صلی اللہ علیہ وسلم نے اس سے اجازت نہیں مانگی جس طرح اس روایت میں اجازت مانگنے کا ذکر ہے جو سیدنا سہل رضی اللہ عنہ سے منقول ہے، تو یہ چیز آپ کی رہنمائی اس بات کی طرف کرے گی کہ یہ دو مختلف فعل ہیں جو دو مختلف مواقع پر پیش آئے تھے، یہ ایک ہی موقع کا واقعہ نہیں ہے۔ [صحیح ابن حبان/كِتَابُ الأَشْرِبَةِ/حدیث: 5337]