سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب اللہ تعالیٰ نے مخلوق (کو پیدا کرنے کا فیصلہ کیا، تو اس نے اپنے پاس موجود کتاب میں یہ تحریر کیا کہ میری رحمت میرے غضب پر غالب آ گئی ہے (راوی کو شک ہے شاید یہ الفاظ ہیں) میری رحمت میرے غضب سے سبقت لے گئی ہے۔“ نبی اکرم صلی اللہ علیہ وسلم فرماتے ہیں: ”تو یہ تحریر اللہ تعالیٰ کے پاس عرش کے اوپر ہے۔“ (راوی کہتے ہیں:) یا شاید جیسے بھی آپ صلی اللہ علیہ وسلم نے ارشاد فرمایا۔ [صحیح ابن حبان/كِتَابُ التَّارِيخِ/حدیث: 6144]