سیدنا جابر رضی اللہ عنہ بیان کرتے ہیں: میں ایک سفر میں نبی اکرم صلی اللہ علیہ وسلم کے ساتھ تھا، میں ایسے اونٹ پر سوار تھا جو لوگوں میں سب سے پیچھے چل رہا تھا۔ نبی اکرم صلی اللہ علیہ وسلم نے کسی چیز سے اسے مارا جو آپ کے پاس موجود تھی، اس کے بعد وہ لوگوں سے آگے نکلنے لگا، یہاں تک کہ مجھے اسے روکنا پڑ رہا تھا۔ نبی اکرم صلی اللہ علیہ وسلم نے فرمایا: ”کیا تم یہ (اونٹ) مجھے اتنی اتنی رقم کے عوض میں فروخت کر دو گے؟ «غَفَرَ اللّٰهُ لَكَ» ”اللہ تعالیٰ تمہاری مغفرت کرے۔“”سیدنا جابر رضی اللہ عنہ کہتے ہیں: میں نے عرض کی: یا رسول اللہ صلی اللہ علیہ وسلم ! یہ ویسے ہی آپ کا ہوا۔ نبی اکرم صلی اللہ علیہ وسلم نے فرمایا: ”کیا تم اتنی اتنی رقم کے عوض میں اسے فروخت کر دو گے؟ «غَفَرَ اللّٰهُ لَكَ» ”اللہ تعالیٰ تمہاری مغفرت کرے۔“”میں نے عرض کی: یا رسول اللہ صلی اللہ علیہ وسلم ! یہ آپ کا ہوا۔ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7140]