سیدنا جابر بن عبداللہ رضی اللہ عنہما بیان کرتے ہیں: ہم نبی اکرم صلی اللہ علیہ وسلم کے ساتھ ایک سفر میں تھے، آپ صلی اللہ علیہ وسلم نے ارشاد فرمایا: ”کیا تم اپنا اونٹ ایک دینار کے عوض میں فروخت کر دو گے؟ جب ہم مدینہ آئیں گے تو میں ( «إِنْ شَاءَ اللّٰهُ» اس کی قیمت ادا کر دوں گا)، «غَفَرَ اللّٰهُ لَكَ» ”اللہ تعالیٰ تمہاری مغفرت کرے۔““ سیدنا جابر رضی اللہ عنہما کہتے ہیں: میں نے عرض کی: یا رسول اللہ صلی اللہ علیہ وسلم ! یہ آپ کا ہی اونٹ ہے۔ نبی اکرم صلی اللہ علیہ وسلم نے فرمایا: ”کیا تم مجھے یہ فروخت کرو گے (اس شرط پر) جب ہم مدینہ منورہ آئیں گے، «إِنْ شَاءَ اللّٰهُ» (اللہ نے چاہا تو) میں تمہیں دو دینار (ادا کر دوں گا)؟“ سیدنا جابر رضی اللہ عنہما کہتے ہیں: میں نے عرض کی: یا رسول اللہ صلی اللہ علیہ وسلم ! یہ آپ کا اونٹ ہے، اس کے بعد نبی اکرم صلی اللہ علیہ وسلم مسلسل یہ ارشاد فرماتے رہے، یہاں تک کہ آپ صلی اللہ علیہ وسلم نے 20 دینار قیمت مقرر کر دی اور ہر مرتبہ یہی فرماتے رہے: «غَفَرَ اللّٰهُ لَكَ» ”اللہ تعالیٰ تمہاری مغفرت کرے۔“ جب ہم مدینہ منورہ آئے اور میں اس اونٹ کو لے کر آپ صلی اللہ علیہ وسلم کی خدمت میں حاضر ہوا، تو میں نے عرض کی: یا رسول اللہ صلی اللہ علیہ وسلم ! یہ آپ کا اونٹ ہے۔ نبی اکرم صلی اللہ علیہ وسلم نے فرمایا: ”اے بلال! اسے مالِ غنیمت میں سے 20 دینار دے دو“ اور (مجھ سے فرمایا): ”تم اپنا اونٹ اپنے گھر واپس لے جاؤ۔“ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7141]