سیدنا ابوسعید خدری رضی اللہ عنہ (راوی کو شک ہے شاید یہ الفاظ ہیں:) سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”سات لوگ ایسے ہیں جنہیں اللہ تعالیٰ اس دن اپنا خاص سایہ نصیب کرے گا جس دن اس کے سائے کے علاوہ اور کوئی سایہ نہیں ہو گا: عادل حکمران، وہ نوجوان جس کی نشوونما اللہ کی عبادت کرتے ہوئے ہوئی، وہ شخص جس کا دل مسجد کے ساتھ معلق رہے اس وقت سے جب وہ مسجد سے نکلتا ہے یہاں تک کہ وہ واپس مسجد کی طرف آ جائے، دو ایسے آدمی جو اللہ تعالیٰ کے لیے ایک دوسرے سے محبت کرتے ہوں، اسی محبت پر وہ اکٹھے ہوتے ہوں اور اسی پر جدا ہوتے ہوں، وہ شخص جو تنہائی میں اللہ کا ذکر کر رہا ہو تو اس کی آنکھوں سے آنسو جاری ہو جائیں، وہ شخص جسے کوئی صاحبِ حیثیت اور خوبصورت عورت (گناہ کی) دعوت دے تو وہ یہ کہے کہ میں اللہ تعالیٰ سے ڈرتا ہوں اور وہ شخص جو کوئی صدقہ دے تو اسے اتنا خفیہ رکھے کہ بائیں ہاتھ کو یہ پتہ نہ چل سکے کہ دائیں ہاتھ نے کیا خرچ کیا ہے۔“ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7338]