سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جہنم کے پل پر سے لوگ گزریں گے۔ اس پر بڑے بڑے کانٹے اور آنکڑے لگے ہوئے ہوں گے، جو لوگوں کو دائیں طرف سے اور بائیں طرف سے اچک لیں گے۔ اس کے دونوں پہلوؤں پر فرشتے موجود ہوں گے اور وہ یہ کہہ رہے ہوں گے: «اللَّهُمَّ سَلِّمْ، سَلِّمْ» ”اے اللہ! سلامتی عطا کرنا، سلامتی عطا کرنا“، تو کچھ لوگ ہوا کی مانند (تیزی سے) گزر جائیں گے۔ کچھ لوگ تیز رفتار گھوڑے کی طرح، کچھ دوڑنے والے شخص کی طرح، کچھ چلنے والے شخص کی طرح، کچھ لوگ گھسٹ کر گزریں گے اور کچھ لوگ گھٹنوں کے بل چلتے ہوئے گزریں گے۔ جہاں تک اہل جہنم کا تعلق ہے جو اس کے اہل ہوں گے، تو وہ جہنم میں نہ تو مریں گے اور نہ ہی زندہ رہیں گے۔ البتہ کچھ لوگوں کے گناہوں کی وجہ سے اور خطاؤں کی وجہ سے ان کی گرفت کی جائے گی اور انہیں جلایا جائے گا۔ جب وہ کوئلہ ہو جائیں گے، تو پھر شفاعت کی اجازت دی جائے گی، تو انہیں گروہ گروہ کر کے لایا جائے گا اور جنت کی نہر میں ڈالا جائے گا اور وہ یوں پھوٹ پڑیں گے جس طرح سیلاب کی گزرگاہ میں دانہ پھوٹ پڑتا ہے۔“ نبی اکرم صلی اللہ علیہ وسلم نے فرمایا: ”کیا تم نے وہ درخت نہیں دیکھا جو ایسی کھلی جگہ پر اگتا ہے؟“ (نبی اکرم صلی اللہ علیہ وسلم فرماتے ہیں:) ”جہنم سے نکالا جانے والا آخری شخص وہ ہو گا جو جہنم کے کنارے پر ہو گا۔ وہ عرض کرے گا: اے میرے پروردگار! میرا چہرہ جہنم سے پھیر دے۔ پروردگار فرمائے گا: تم یہ عہد کرو کہ تم اس کے علاوہ مجھ سے کچھ اور نہیں مانگو گے۔“ نبی اکرم صلی اللہ علیہ وسلم فرماتے ہیں: ”پل صراط پر تین درخت ہوں گے۔ وہ بندہ عرض کرے گا: اے میرے پروردگار! مجھے اس درخت کی طرف پھیر دے تاکہ میں اس کا پھل کھا لوں اور سائے میں آ جاؤں۔ پروردگار فرمائے گا: تم یہ عہد کرو تم اس کے علاوہ مجھ سے کچھ اور نہیں مانگو گے۔“ نبی اکرم صلی اللہ علیہ وسلم فرماتے ہیں: ”پھر وہ شخص دوسرے درخت کو دیکھے گا وہ اس سے زیادہ اچھا ہے تو وہ کہے گا: اے میرے پروردگار! مجھے اس کی طرف پھیر دے تاکہ میں اس کا پھل کھا لوں اور اس کے سائے میں آ جاؤں۔“ نبی اکرم صلی اللہ علیہ وسلم فرماتے ہیں: ”پروردگار یہ فرمائے گا: تم یہ عہد کرو کہ تم اس کے علاوہ کچھ اور نہیں مانگو گے۔ پھر وہ تیسرے درخت کو دیکھے گا کہ وہ اس سے بھی زیادہ اچھا ہے تو عرض کرے گا: اے میرے پروردگار! تو مجھے اس درخت کے پاس لے جا تاکہ میں اس کا پھل کھاؤں اور اس کے سائے میں آؤں۔“ نبی اکرم صلی اللہ علیہ وسلم فرماتے ہیں: ”پھر وہ شخص (جنت میں) لوگوں کے ہجوم کو دیکھے گا اور ان کا کلام سنے گا تو عرض کرے گا: اے میرے پروردگار! مجھے جنت میں داخل کر دے۔“ ابونضرہ نامی راوی بیان کرتے ہیں: یہاں سیدنا ابوسعید خدری رضی اللہ عنہ اور نبی اکرم صلی اللہ علیہ وسلم کے ایک صحابی کے درمیان (الفاظ کو نقل کرنے) میں اختلاف ہوا۔ ان میں سے ایک کا یہ کہنا تھا: ”پروردگار اسے جنت میں داخل کر دے گا اور اسے دنیا اور اس کی مانند مزید (جگہ جنت میں عطا کرے گا)“ اور دوسرے صحابی نے یہ کہا: ”پھر وہ شخص جنت میں داخل ہو گا اور اسے دنیا اور اس کی مانند دس گنا (مزید جگہ) عطا کی جائے گی۔“ (امام ابن حبان رحمہ اللہ فرماتے ہیں:) امام ابویعلی نے اسی طرح یہ بیان کیا ہے کہ پل صراط پر تین درخت ہوں گے حالانکہ روایت کے اصل الفاظ یہ ہیں: ”پل صراط کے ایک طرف (یعنی جنت والی طرف) تین درخت ہوں گے۔“ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7379]

سیدہ عائشہ صدیقہ رضی اللہ عنہا بیان کرتی ہیں، میں نے عرض کی: یا رسول اللہ! اللہ تعالیٰ کے اس فرمان ﴿يَوْمَ تُبَدَّلُ الْأَرْضُ غَيْرَ الْأَرْضِ وَالسَّمَاوَاتُ ۖ وَبَرَزُوا لِلَّهِ الْوَاحِدِ الْقَهَّارِ﴾ [سورة إبراهيم: 48] ”جب زمین کو دوسری زمین میں تبدیل کر دیا جائے گا اور آسمان کو بھی (تبدیل کر دیا جائے گا) اور سب لوگ ایک اور زبردست اللہ کی بارگاہ میں حاضر ہوں گے“ کے بارے میں آپ کی کیا رائے ہے؟ تو اس وقت لوگ کہاں ہوں گے؟ نبی اکرم صلی اللہ علیہ وسلم نے فرمایا: ”وہ پل صراط پر ہوں گے۔“ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7380]