سیدنا ابومالک الاشجعی رضی اللہ عنہ اپنے والد کے حوالے سے بیان کرتے ہیں کہ جو شخص مسلمان ہوتا، رسول اللہ صلی اللہ علیہ وسلم اس کو یہ دعا سکھاتے: ” اللّٰھمّ اھدنی وارزقنی، وعافنی وارحمنی۔ “ ” اے اللہ مجھے ہدایت عطا فرما، مجھے رزق دے، مجھے عافیت عطا فرما اور میرے اوپر رحم فرما)۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1961]

اُمّ المومنین سیّدہ عائشہ رضی اللہ عنہا فرماتی ہیں: رسول اللہ صلی اللہ علیہ وسلم یہ دعا مانگا کرتے تھے: ” اللّٰھمّ عافنی فی جسدی، وعافنی فی بصری، واجعلہ الوارث منّی، لا الہ الا اللّٰہ الحلیم الکریم سبحان اللّٰہ رب العرش العظیم، الحمدللّٰہ ربّ العالمین۔ “ ” اے اللہ! میرے جسم میں عافیت عطا فرما، اے اللہ میری بصارت میں عافیت عطا فرما اور اس کو میرا وارث بنا، اللہ کے سوا کوئی عبادت کے لائق نہیں، وہ حلیم و کریم ہے، اللہ پاک ہے، عرشِ عظیم کا رب، تمام تعریفیں اس اللہ کے لیے ہیں جو تمام جہانوں کا مالک ہے، اور پالنے والا ہے۔ “ ٭٭ اگر حبیب کا عروہ سے سماع ثابت ہے تو یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1962]