سیدنا عمر رضی اللہ عنہ سے منقول ہے کہ نبی اکرم صلی اللہ علیہ وسلم پانچ چیزوں سے پناہ مانگا کرتے تھے: (1) بزدلی (2) بخل (3) بری زندگی (4) عذابِ قبر اور (5) فتنۂ صدر سے (یعنی آدمی کسی فتنہ میں مبتلا ہو کر مَر جائے اور معاذاللہ توبہ کا موقع نہ ملے)۔ ٭٭ یہ حدیث امام بخاری رحمۃ اللہ علیہ و امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1964]

سیدنا انس بن مالک رضی اللہ عنہ فرماتے ہیں: رسول اللہ صلی اللہ علیہ وسلم اپنی دعا میں یوں کہا کرتے تھے: ” اللّٰھمّ انّی اعوذبک من العز والکسل، والجبن والبخل، والھرم والقسوۃ، والغفلۃ، والعیلۃ والذلّۃ والمسکنۃ، واعوذبک من الفقر والکفر، والفسوق، والشقاق، والنفاق والسمعۃ، والریاء، واعوذبک من الصمم والبکم والجنون، والجذام، بالبرص، وسیّء الاسقام۔ “ ” اے اللہ! میں تیری پناہ مانگتا ہوں عجز سے، بزدلی سے، کاہلی سے، بخل سے، اور شدید بڑھاپے سے، دل کی سختی سے، خود پسندی سے، اور ریاکاری سے، اور میں تیری پناہ مانگتا ہوں، گونگے پن سے، بہرے پن سے، جنون سے، جذام سے، برص سے، اور سخت بیماری سے۔ “ ٭٭ یہ حدیث امام بخاری رحمۃ اللہ علیہ و امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1965]