سیدنا کعب بن عمرو رضی اللہ عنہ سے مروی ہے کہ نبی اکرم صلی اللہ علیہ وسلم یوں دعا مانگا کرتے تھے: ” اللّٰھمّ انّی اعوذبک من الھدم، والتردّی، والھرم، والغم والغرق، والحرق، واعوذبک ان یتخبطنی الشیطان عند الموت، واعوذبک ان اموت فی سبیلک مدبرا، واعوذبک ان اموت فی سبیلک لدیغا۔ “ ” اے اللہ! میں تیری پناہ مانگتا ہوں عمارت کے گرنے سے، کنویں میں گرنے سے، شدید بڑھاپے سے، غرق ہونے سے، جلنے سے، اور میں تیری پناہ مانگتا ہوں اس بات سے کہ موت کے وقت شیطان میری عقل پر غلبہ پا لے اور میں تیری پناہ مانگتا ہوں اس بات سے کہ تیری راہ میں جہاد کے دوران پیٹھ پھیر کر بھاگتے ہوئے مروں اور تیری پناہ مانگتا ہوں اس بات سے کہ تیرے راستے میں ڈسا ہوا مروں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1969]

سیدنا زیاد بن علاقہ رضی اللہ عنہ اپنے چچا سے روایت کرتے ہیں کہ نبی اکرم صلی اللہ علیہ وسلم یوں دعا مانگا کرتے تھے:” اللّٰھمّ جنبْنی منکرات ااخلاق، والاھواء، والاعمال والادواء۔ “ ” اے اللہ! مجھے اخلاقیات، خواہشات اعمال اور عبادت میں مکروہات سے بچا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1970]