سیدنا عبداللہ بن سلام رضی اللہ عنہ فرماتے ہیں کہ ہم رسول اللہ صلی اللہ علیہ وسلم کے صحابہ رضی اللہ عنہم میں بیٹھے ہوئے یہ باتیں کر رہے تھے کہ اگر ہمیں پتہ چل جائے کہ اللہ تعالیٰ کو سب سے زیادہ کون سا عمل پسند ہے؟ تو ہم وہی عمل بجا لائیں، تو اللہ تعالیٰ نے یہ آیت نازل فرمائی: (سَبَّحَ لِلّٰہِ مَا فِی السَّمَوَاتِ وَمَا فِی الْاَرْضِ وَھُوَ الْعَزِیْزُ الْحَکِیْمُ) ” اللہ کی پاکی بولتا ہے جو کچھ آسمانوں میں ہے اور جو کچھ زمین میں ہے اور وہی عزت و حکمت والا ہے “۔۔ (سورۃ کے آخر تک) پھر رسول اللہ صلی اللہ علیہ وسلم نے یہ سورت ہمیں پڑھ کر سنائی۔ ٭٭ اوزاعی نے بھی ایسے ہی کہا کہ یحیی بن ابی کثیر نے مکہ میں ہمارے سامنے یہ سورت پڑھی اور محمد بن کثیر فرماتے ہیں ہمارے سامنے اوزاعی نے ایسے ہی سورت پڑھی، ابوالحسن بن عقبہ فرماتے ہیں ہمارے سامنے ابوالولید نے اسی طرح سورت پڑھی اور امام حاکم فرماتے ہیں: ہمارے استاد ابوالحسن شیبانی نے ہمارے سامنے یہ سورت ایسے ہی پڑھی اور امام حاکم ابوعبداللہ نے ہمارے سامنے شروع سے لے کر آخر تک پوری سورت پڑھی، ولید بن مسلم نے اوزاعی سے سند سے شروع سے لے کر آخر تک پوری روایت کی۔ [المستدرك على الصحيحين/كِتَابُ: الْجِهَادِ/حدیث: 2415]

سیدنا عبداللہ بن سلام رضی اللہ عنہ فرماتے ہیں کہ ہم نبی اکرم صلی اللہ علیہ وسلم کے پاس بیٹھے ہوئے تھے، ہم نے کہا: اگر ہمیں پتہ چل جائے کہ اللہ تعالیٰ کو کون سا عمل سب سے زیادہ پسند ہے؟ پھر اس کے بعد گزشتہ حدیث کی طرح حدیث ذکر کی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ اور میرا غالب گمان ہے ہقل بن زیاد کی روایت کی وجہ سے شیخین رحمۃ اللہ علیہما نے اس حدیث کو نقل نہیں کیا۔ ولید بن مسلم وغیرہ کی روایت اس حدیث کو ترک کرنے کی وجہ نہیں ہے۔ (ہقل بن زیاد کی روایت کردہ حدیث درج ذیل ہے) [المستدرك على الصحيحين/كِتَابُ: الْجِهَادِ/حدیث: 2416]

سیدنا عبداللہ بن سلام رضی اللہ عنہ فرماتے ہیں کہ ہم نبی اکرم صلی اللہ علیہ وسلم کے پاس بیٹھے ہوئے تھے، ہم نے کہا: اگر ہمیں پتہ چل جائے کہ اللہ تعالیٰ کو کون سا عمل سب سے زیادہ پسند ہے۔ پھر اس کے بعد گزشتہ حدیث کی طرح حدیث نقل کی۔ ٭٭ ولید بن مسلم کی حدیث کے متعلق یہ بات نہ کہی جائے، اس لیے کہ ہقل بن زیاد اگرچہ قابل اعتماد راوی ہیں لیکن انہوں نے اپنی سند میں شک بیان کیا ہے اور ابوسلمہ کی سند کے صحیح ہونے پر یہ بھی دلیل ہے کہ ابواسحٰق ابراہیم بن محمد فزاری اوزاعی کے شاگردوں میں سب سے زیادہ مضبوط حافظے والے ہیں، انہوں نے پہلی سند کے ہمراہ چند الفاظ کے اضافے کے ساتھ حدیث ذکر کی ہے۔ [المستدرك على الصحيحين/كِتَابُ: الْجِهَادِ/حدیث: 2417]

سیدنا عبداللہ بن سلام رضی اللہ عنہ فرماتے ہیں: ایک دفعہ ہم اکٹھے بیٹھے آپس میں یہ گفتگو کر رہے تھے کہ کون شخص رسول اللہ صلی اللہ علیہ وسلم کے پاس جا کر یہ دریافت کرے کہ اللہ تعالیٰ کو کون سا عمل سب سے زیادہ پسند ہے پھر ہم وہاں سے چلے گئے اور یہ طے نہ کر سکے کہ آپ کے پاس کون جائے گا پھر رسول اللہ صلی اللہ علیہ وسلم نے ہماری طرف پیغام بھیجا (اور ہمیں بلوایا) ہم سب جمع ہو گئے اور ہم (اپنا مسئلہ حل ہو جانے کی خوشی میں) ایک دوسرے کی طرف اشارہ کرنے لگے پھر آپ نے ہمارے سامنے (سَبَّحَ لِلّٰہِ مَا فِی السَّمَوَاتِ وَمَا فِی الْاَرْضِ) “ آخر تک ساری سورت پڑھی۔ ٭٭ ابوسلمہ فرماتے ہیں: ہمارے سامنے عبداللہ بن سلام نے بھی پوری سورت پڑھی، یحیی بن ابی کثیر فرماتے ہیں: ہمارے سامنے ابوسلمہ نے شروع سے لے کر آخر تک پوری سورت پڑھی، محبوب فرماتے ہیں: ہمارے سامنے ابواسحٰق نے شروع سے آخر تک پوری سورۂ صف پڑھی۔ [المستدرك على الصحيحين/كِتَابُ: الْجِهَادِ/حدیث: 2418]