سیدنا عبداللہ بن عباس رضی اللہ عنہما سے روایت ہے کہ جب اللہ عزوجل نے یہ آیات نازل فرمائیں: ﴿وَلَا تَقْرَبُوا مَالَ الْيَتِيمِ إِلَّا بِالَّتِي هِيَ أَحْسَنُ﴾ ”اور یتیم کے مال کے قریب نہ جاؤ مگر ایسے طریقے سے جو بہترین ہو“ [سورة الأنعام: 152] اور ﴿إِنَّ الَّذِينَ يَأْكُلُونَ أَمْوَالَ الْيَتَامَى ظُلْمًا﴾ ”بے شک وہ لوگ جو یتیموں کا مال ظلم کے ساتھ کھاتے ہیں (وہ اپنے پیٹ میں آگ بھرتے ہیں)“ [سورة النساء: 10] ، تو جس کسی کے پاس یتیم ہوتا وہ اس کا کھانا اپنے کھانے سے اور اس کا پینا اپنے پینے سے بالکل الگ کر دیتا، وہ یتیم کے کھانے میں سے کچھ بچا کر رکھ دیتے اور وہ تب تک پڑا رہتا جب تک وہ اسے کھا نہ لیتا یا وہ خراب ہو جاتا تو اسے پھینک دیا جاتا، یہ صورتحال ان (صحابہ) پر بڑی کٹھن ثابت ہوئی، تو انہوں نے اس کا تذکرہ رسول اللہ صلی اللہ علیہ وسلم سے کیا، جس پر اللہ عزوجل نے یہ آیت نازل فرمائی: ﴿وَيَسْأَلُونَكَ عَنِ الْيَتَامَى قُلْ إِصْلَاصٌ لَهُمْ خَيْرٌ وَإِنْ تُخَالِطُوهُمْ فَإِخْوَانُكُمْ﴾ ”اور وہ آپ سے یتیموں کے بارے میں دریافت کرتے ہیں، فرما دیجیے کہ ان کی (مالی) اصلاح کرنا ہی بہتر ہے اور اگر تم ان کے ساتھ مل جل کر رہو تو وہ تمہارے بھائی ہی ہیں“ [سورة البقرة: 220] ، اس کے بعد انہوں نے اپنا کھانا پینا ان کے ساتھ ملا لیا۔
یہ حدیث صحیح الاسناد ہے لیکن شیخین نے اسے روایت نہیں کیا، ہمارے ائمہ نے اسے غزوے کے دوران مشترکہ طور پر خرچ کرنے یعنی «المُناهَدة» کی رخصت کے لیے دلیل کے طور پر پیش کیا ہے۔ [المستدرك على الصحيحين/كِتَابُ: الْجِهَادِ/حدیث: 2530]