سیدنا مجمع بن جاریہ رضی اللہ عنہ فرماتے ہیں: ہم رسول اللہ صلی اللہ علیہ وسلم کے ہمراہ حدیبیہ سے واپس پلٹے۔ جب رسول اللہ صلی اللہ علیہ وسلم مقام ” کراع الغمیم “ میں پہنچے تو لوگ رسول اللہ صلی اللہ علیہ وسلم کی جانب دوڑے چلے آ رہے تھے۔ بعض لوگوں نے دوسروں سے پوچھا: لوگوں کو کیا ہوا؟ انہوں نے جواب دیا: رسول اللہ صلی اللہ علیہ وسلم پر وحی نازل ہو رہی ہے۔ تو کچھ لوگوں نے کہا: ہم بھی چل دئیے حتیٰ کہ ہم نے رسول اللہ صلی اللہ علیہ وسلم کو ” کراع الغمیم “ کے پاس کھڑے پایا۔ جب لوگ آپ کے گرد جمع ہو گئے تو آپ نے یہ آیت لوگوں کو پڑھ کر سنائی: اِنَّا فَتَحْنَا لَکَ فَتْحًا مُّبِیْنًا (الفتح: 1) ” بیشک ہم نے تمہارے لیے روشن فتح فرما دی۔“ کچھ لوگوں نے کہا: کیا وہ فتح ہے؟ آپ صلی اللہ علیہ وسلم نے فرمایا: اس ذات کی قسم! جس کے قبضہ قدرت میں میری جان ہے ” وہ فتح ہے “۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3753]

سیدنا انس بن مالک رضی اللہ عنہ اللہ تعالیٰ کے ارشاد: اِنَّا فَتَحْنَا لَکَ فَتْحًا مُّبِیْنًا (الفتح: 1) ” بیشک ہم نے تمہارے لیے روشن فتح فرما دی۔“ کے متعلق فرماتے ہیں: (اس سے مراد) ” فتح خیبر “ ہے۔ لِّیَغْفِرَ لَکَ اللّٰہُ مَا تَقَدَّمَ مِنْ ذَنْبِکَ وَ مَا تَاَخَّرَ) (الفتح: 2) ” تاکہ اللہ تعالیٰ آپ کے اگلے پچھلے گناہ معاف کر دے۔“ صحابہ کرام رضوان اللہ علیہم اجمعین نے کہا: یا رسول اللہ صلی اللہ علیہ وسلم ! مبارک ہو اور ہمارے لئے کیا خوشخبری ہے؟ تو اللہ تعالیٰ نے اگلی آیت نازل فرما دی: لِیُدْخِلَ الْمُؤْمِنِیْنَ وَ الْمُؤْمِنٰتِ جَنّٰتٍ تَجْرِیْ مِنْ تَحْتِھَا الْاَنْھٰرُ (الفتح: 5) ” تاکہ ایمان والے مردوں اور ایمان والی عورتوں کو باغوں میں لے جائے جن کے نیچے نہریں جاری ہیں۔“ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے اس اسناد کے ہمراہ نقل نہیں کیا۔ تاہم امام مسلم رحمۃ اللہ علیہ نے ابوموسیٰ رحمۃ اللہ علیہ کے واسطے سے محمد بن شعبہ سے ان کی سند کے ہمراہ یہ روایت کیا ہے کہ ” انا فتحنا لک فتحا مبینا “ (اس سے مراد) فتح خیبر ہے۔ صرف اتنا ہی روایت کیا ہے اور حکم بن عبدالملک نے اس حدیث کو ایسے انداز میں بیان کیا ہے کہ جس میں حنین اور خیبر دونوں کا ذکر ہے۔ [المستدرك على الصحيحين/كِتَابُ التَّفْسِيرِ/حدیث: 3754]