سیدنا طارق بن شہاب رضی اللہ عنہ سے روایت ہے کہ جب سیدنا عمر رضی اللہ عنہ شام پہنچے تو ان کے سامنے پانی کی ایک گزرگاہ آئی، سیدنا عمر اپنی اونٹنی سے نیچے اترے، اپنے چمڑے کے موزے اتارے، اپنی اونٹنی کی نکیل پکڑی اور اسے پانی میں سے لے کر گزرنے لگے، تو سیدنا ابوعبیدہ بن جراح رضی اللہ عنہ نے ان سے کہا: اے امیر المؤمنین! آپ نے آج اہل زمین (اہل شام) کے سامنے ایک بہت بڑا (عجیب) کام کیا ہے؛ آپ نے موزے اتارے، اونٹنی کی نکیل خود تھامی اور پانی میں سے پیدل گزرے؟ راوی کہتے ہیں کہ سیدنا عمر رضی اللہ عنہ نے اپنا ہاتھ سیدنا ابوعبیدہ کے سینے پر مارا اور فرمایا: ”کاش! تمہارے علاوہ کوئی اور یہ بات کہتا اے ابوعبیدہ، تم سب سے قلیل اور ذلیل لوگ تھے، پھر اللہ نے تمہیں اسلام کے ذریعے عزت بخشی، پس جب کبھی تم اسلام کے سوا کسی اور چیز میں عزت تلاش کرو گے تو اللہ تعالیٰ تمہیں ذلیل و خوار کر دے گا۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4531]