ام المؤمنین سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا: ”رضاعت کی بنا پر وہ تمام رشتے حرام ہو جاتے ہیں جو ولادت کے تعلق سے حرام ہیں۔“ [سنن ابي داود/كِتَاب النِّكَاحِ/حدیث: 2055]

ام المؤمنین سیدہ ام سلمہ رضی اللہ عنہا سے مروی ہے کہ ام المؤمنین سیدہ ام حبیبہ رضی اللہ عنہا نے کہا: ”اے اللہ کے رسول! کیا آپ میری بہن میں راغب ہیں؟“ آپ صلی اللہ علیہ وسلم نے فرمایا: ”تو کیا کروں؟“ کہنے لگیں کہ ”آپ اس سے نکاح کر لیں۔“ آپ صلی اللہ علیہ وسلم نے فرمایا: ”تیری بہن سے؟“ بولیں: ”ہاں۔“ آپ صلی اللہ علیہ وسلم نے فرمایا: ”کیا تمہیں یہ پسند ہے؟“ کہنے لگیں: ”میں کوئی آپ کے پاس اکیلی تو نہیں ہوں۔ اور اس شراکت میں مجھے یہ زیادہ پسند ہے کہ میری بہن اس خیر میں میری حصہ دار بنے۔“ آپ صلی اللہ علیہ وسلم نے فرمایا: ”یہ میرے لیے حلال نہیں ہے۔“ وہ کہنے لگیں: ”قسم اللہ کی! مجھے بتایا گیا ہے کہ آپ نے درہ یا ذرہ (حدیث کے راوی) زہیر کو شک ہے دختر ابو سلمہ کے لیے پیغام بھجوایا ہے۔“ آپ صلی اللہ علیہ وسلم نے فرمایا: ”ام سلمہ کی بیٹی کے لیے؟“ کہنے لگیں: ”ہاں۔“ آپ صلی اللہ علیہ وسلم نے فرمایا: ”قسم اللہ کی! وہ اگر میری ربیبہ نہ بھی ہوتی جو کہ میری پرورش میں ہے، تو بھی میرے لیے حلال نہ ہو سکتی تھی کیونکہ وہ میرے دودھ کے بھائی کی بیٹی (رضاعی بھتیجی) ہے۔ مجھے اور اس کے والد (ابو سلمہ) کو ثوبیہ نے دودھ پلایا تھا۔ سو مجھے اپنی بیٹیوں اور بہنوں کی پیش کش مت کرو۔“ [سنن ابي داود/كِتَاب النِّكَاحِ/حدیث: 2056]