سیدنا عروہ بن زبیر رضی اللہ عنہ فرماتے ہیں: سیدنا معن بن عدی رضی اللہ عنہ مسیلمہ کذاب کے ساتھ جنگ والے دن (یعنی) جنگ یمامہ میں شہید ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5083]

ابراہیم بن منذر فرماتے ہیں: عباد بن بشر بن وقش رضی اللہ عنہ بنی عبدالاشہل میں سے ہیں، ان کی کنیت ابوبشر تھی، اور یہ بھی کہا جاتا ہے کہ ان کی کنیت ابوالربیع تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5084]

محمد بن عمر نے عباد بن بشر رضی اللہ عنہ کا شجرہ نسب یوں بیان کیا ہے ” عباد بن بشر بن وقش بن زغبہ بن زعوراء بن عبدالاشہل “ ان کی کنیت ابوبشر تھی۔ جبکہ عبداللہ بن محمد بن بشر بن عمارہ کہتے ہیں کہ ان کی کنیت ابوالربیع تھی، یہ سیدنا سعد بن معاذ رضی اللہ عنہ کے اسلام لانے سے پہلے، مدینہ منورہ میں سیدنا مصعب بن عمیر رضی اللہ عنہ کے ہاتھ پر اسلام لائے تھے۔ سیدنا عباد بن بشر رضی اللہ عنہ جنگ بدر میں شریک ہوئے، اور آپ کعب بن اشرف کو قتل کرنے والوں میں شامل تھے، آپ جنگ احد، جنگ خندق اور تمام غزوات میں رسول اللہ صلی اللہ علیہ وسلم کے ہمراہ شریک ہوئے۔ جنگ یمامہ میں بھی آپ نے شرکت کی، اس دن آپ پر آزمائش بہت سخت تھی، اور آپ لڑائی میں بہت مشقت میں تھے، حتی کہ اسی دن شہید ہو گئے۔ یہ بارہویں سن ہجری کا واقعہ ہے اس وقت آپ کی عمر 45 برس تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5085]