محمد بن عمر کہتے ہیں کہ ابو سفیان بن حارث بن عبد المطلب بن ہاشم، رسول اللہ صلی اللہ علیہ وسلم کے رضاعی بھائی اور آپ صلی اللہ علیہ وسلم کے چچا زاد تھے، انہیں سیدہ حلیمہ سعدیہ رضی اللہ عنہا نے چند دن دودھ پلایا تھا، وہ رسول اللہ صلی اللہ علیہ وسلم سے بہت مانوس تھے، پھر جب رسول اللہ صلی اللہ علیہ وسلم مبعوث ہوئے تو انہوں نے آپ صلی اللہ علیہ وسلم سے دشمنی کی، آپ صلی اللہ علیہ وسلم اور آپ صلی اللہ علیہ وسلم کے صحابہ کی ہجو کی، اور وہ بیس سال تک رسول اللہ صلی اللہ علیہ وسلم کی مخالفت پر ڈٹے رہے، وہ قریش کے کسی ایسے معرکے سے پیچھے نہیں رہے جو رسول اللہ صلی اللہ علیہ وسلم سے لڑنے کے لیے گیا ہو، پھر جب رسول اللہ صلی اللہ علیہ وسلم کے فتحِ مکہ کے لیے روانہ ہونے کا تذکرہ ہوا تو اللہ عزوجل نے ان کے دل میں اسلام ڈال دیا، چنانچہ وہ مقامِ ابواء پر پڑاؤ سے پہلے رسول اللہ صلی اللہ علیہ وسلم سے ملے اور وہ اور ان کے بیٹے جعفر اسلام لے آئے، وہ رسول اللہ صلی اللہ علیہ وسلم کے ساتھ (مکہ کی طرف) نکلے اور فتح مکہ اور غزوہ حنین میں شریک ہوئے، ابو سفیان کہتے ہیں: جب حنین کے دن ہمارا دشمن سے سامنا ہوا تو میں اپنے گھوڑے سے کود پڑا اور میرے ہاتھ میں بے نیام تلوار تھی، اللہ جانتا ہے کہ میں آپ صلی اللہ علیہ وسلم کے سامنے (آپ صلی اللہ علیہ وسلم کی حفاظت میں) موت چاہتا تھا جبکہ آپ صلی اللہ علیہ وسلم میری طرف دیکھ رہے تھے، تو سیدنا عباس رضی اللہ عنہ نے عرض کیا: یا رسول اللہ! یہ آپ کے بھائی اور چچا زاد ابو سفیان بن حارث ہیں، ان سے راضی ہو جائیے، آپ صلی اللہ علیہ وسلم نے فرمایا: ”میں نے ایسا ہی کیا، اللہ ان کی وہ تمام دشمنیاں معاف فرمائے جو انہوں نے مجھ سے کیں“، پھر آپ صلی اللہ علیہ وسلم میری طرف متوجہ ہوئے اور فرمایا: ”میری عمر کی قسم، یہ میرا بھائی ہے“، تو میں نے رکاب میں آپ صلی اللہ علیہ وسلم کے قدم مبارک کو چوم لیا۔ راوی کہتے ہیں: ابو سفیان بن حارث کی وفات مدینہ منورہ میں ان کے بھائی نوفل بن حارث کے چار ماہ الا تیرہ دن بعد ہوئی، اور کہا جاتا ہے کہ ان کی وفات سنہ 20 ہجری میں ہوئی، سیدنا عمر بن خطاب رضی اللہ عنہ نے ان کی نماز جنازہ پڑھائی اور انہیں بقیع میں عقیل بن ابی طالب کے گھر کے کونے میں دفن کیا گیا، وہ وہی ہیں جنہوں نے اپنی وفات سے تین دن پہلے خود اپنی قبر کھودی تھی۔
میں نے فتح مکہ کے بیان میں ابو سفیان کے اسلام لانے کا تذکرہ پہلے بھی کر دیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5187]