یحییٰ بن عبد اللہ بن ابی قتادہ اپنے والد سے اور وہ سیدنا ابو قتادہ رضی اللہ عنہ سے روایت کرتے ہیں کہ ذی قرد کے دن رسول اللہ صلی اللہ علیہ وسلم مجھ سے ملے، آپ صلی اللہ علیہ وسلم نے میری طرف دیکھا اور دعا فرمائی: «اللهمَّ بارِكْ له في شَعَرِه وبَشَرِه» ”اے اللہ! اس کے بالوں اور اس کی جلد (کھال) میں برکت عطا فرما،“ اور فرمایا: ”تیرا چہرہ بامراد ہوا،“ میں نے عرض کیا: اور آپ کا چہرہ بھی یا رسول اللہ، آپ صلی اللہ علیہ وسلم نے دریافت فرمایا: ”کیا تم نے مسعدہ کو قتل کر دیا؟“ میں نے عرض کیا: جی ہاں، آپ صلی اللہ علیہ وسلم نے فرمایا: ”پھر تمہارے چہرے پر یہ کیا (نشان) ہے؟“ میں نے عرض کیا: یا رسول اللہ! ایک تیر لگا تھا، آپ صلی اللہ علیہ وسلم نے فرمایا: ”قریب آؤ،“ میں قریب ہوا تو آپ صلی اللہ علیہ وسلم نے اس پر اپنا لعابِ دہن لگایا، پھر وہ زخم نہ کبھی دکھا اور نہ ہی اس میں پیپ پڑی۔ یحییٰ بن عبد اللہ کہتے ہیں کہ سیدنا ابو قتادہ رضی اللہ عنہ کی وفات 54 ہجری میں مدینہ منورہ میں ہوئی جبکہ ان کی عمر ستر برس تھی، ابن عمر کہتے ہیں کہ ابو قتادہ کی اولاد اور اہل مدینہ کے نزدیک اس میں کوئی اختلاف نہیں کہ ان کی وفات مدینہ میں ہوئی، البتہ اہل کوفہ نے روایت کیا ہے کہ ان کا انتقال کوفہ میں ہوا۔
یہ حدیث صحیح ہے مگر شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6145]

ابراہیم بن منذر سے روایت ہے کہ بنو سلمہ کے فرد ابو قتادہ بن ربعی رضی اللہ عنہ کی وفات 54 ہجری میں مدینہ منورہ میں ہوئی جبکہ ان کی عمر ستر برس تھی۔
رسول اللہ صلی اللہ علیہ وسلم کے آزاد کردہ غلام سیدنا ثوبان رضی اللہ عنہ کے مناقب کا ذکر۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6146]