سیدنا مسیب بن رافع فرماتے ہیں: جس زمانے میں سیدنا عبداللہ بن عباس رضی اللہ عنہما کی بینائی زائل ہو گئی تھی، ان دنوں کی بات ہے کہ ایک آدمی ان کے پاس آیا اور کہنے لگا: اگر آپ مجھے سات دن کا موقع دیں اور میری بات مانیں تو میں آپ کا علاج کر سکتا ہوں اور آپ ٹھیک ہو جائیں گے۔ سات دن لیٹ کر اشارے سے نماز پڑھنی ہے۔ سیدنا عبداللہ بن عباس رضی اللہ عنہما نے ام المومنین سیدہ عائشہ رضی اللہ عنہا، سیدنا ابوہریرہ رضی اللہ عنہ اور دیگر صحابہ کرام رضی اللہ عنہم کی جانب پیغام بھیجا اور اس بارے میں مسئلہ دریافت کیا۔ سب نے کہا: اگر آپ ان سات ایام میں فوت ہو گئے تو آپ کی نمازوں کا کیا بنے گا؟ چنانچہ انہوں نے اپنی آنکھوں کا علاج چھوڑ دیا اور اس سے دوا نہ لی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6455]

خلیفہ بن خیاط کہتے ہیں: سیدنا عوف بن مالک اشجعی رضی اللہ عنہ کی کنیت ” ابوعبدالرحمن “ تھی۔ بعض مؤرخین نے کہا ہے کہ ان کی کنیت ” ابوعمرو “ تھی۔ آپ ملک شام کے رہنے والے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6456]