سیدنا عوف بن مالک اشجعی رضی اللہ عنہ بیان کرتے ہیں کہ میں غزوہ تبوک کے موقع پر رسول اللہ صلی اللہ علیہ وسلم کے پاس حاضر ہوا، اس وقت سحری کا آخری وقت تھا اور آپ صلی اللہ علیہ وسلم اپنے خیمے میں تشریف فرما تھے، میں نے سلام کیا اور پوچھا: ”اے اللہ کے رسول! کیا میں اندر آ جاؤں؟“ آپ صلی اللہ علیہ وسلم نے فرمایا: ”اندر آ جاؤ،“ میں نے پوچھا: ”کیا میں پورا (اندر) آ جاؤں؟“ آپ صلی اللہ علیہ وسلم نے فرمایا: ”ہاں پورے آ جاؤ،“ پھر آپ صلی اللہ علیہ وسلم نے فرمایا: ”قیامت سے پہلے چھ نشانیاں ظاہر ہوں گی: پہلی تمہارے نبی کی وفات، کہو ایک“ میں نے کہا: ایک، ”دوسری بیت المقدس کی فتح، کہو دو“ میں نے کہا: دو، ”تیسری ایسی طاعون کی بیماری جو تمہیں اس طرح اچانک ہلاک کرے گی جیسے بھیڑوں کو حلق کی بیماری (قعاص) ہلاک کر دیتی ہے، کہو تین“ میں نے کہا: تین، ”چوتھی یہ کہ تم میں مال کی اتنی فراوانی ہو جائے گی کہ ایک شخص کو سو دینار بھی دیے جائیں گے تو وہ اس پر ناراض ہی رہے گا (یعنی اسے کم سمجھے گا)، کہو چار“ میں نے کہا: چار، ”پانچویں ایسا فتنہ جو تم میں برپا ہوگا اور عرب کا کوئی خیمہ یا پکا گھر ایسا نہیں ہوگا جہاں وہ داخل نہ ہو جائے، کہو پانچ“ میں نے کہا: پانچ، ”اور چھٹی ایک صلح جو تمہارے اور بنو اصفر (رومیوں) کے درمیان ہوگی، وہ تمہارے خلاف نو ماہ تک لشکر جمع کریں گے، پھر وہ تم سے غداری کریں گے اور اسیّ جھنڈوں کے ساتھ تم پر چڑھائی کریں گے اور ہر جھنڈے کے نیچے بارہ ہزار سپاہی ہوں گے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6460]