مسروق سے روایت ہے کہ سیدہ عائشہ رضی اللہ عنہا نے مجھ سے فرمایا: میں نے جبرائیل علیہ السلام کو اپنے اسی حجرے میں کھڑے ہوئے دیکھا جبکہ رسول اللہ صلی اللہ علیہ وسلم ان سے سرگوشی فرما رہے تھے، جب آپ صلی اللہ علیہ وسلم اندر تشریف لائے تو میں نے عرض کیا: اے اللہ کے رسول! وہ کون تھے جن سے آپ سرگوشی فرما رہے تھے؟ آپ صلی اللہ علیہ وسلم نے فرمایا: ”کیا تم نے انہیں دیکھا ہے؟“ میں نے عرض کیا: جی ہاں، آپ صلی اللہ علیہ وسلم نے فرمایا: ”تم نے انہیں کس کے مشابہ پایا؟“ میں نے عرض کیا: دحیہ کلبی کے مشابہ، آپ صلی اللہ علیہ وسلم نے فرمایا: ”تم نے بہت بڑی خیر دیکھی ہے، وہ جبرائیل تھے،“ پھر تھوڑی ہی دیر گزری تھی کہ آپ صلی اللہ علیہ وسلم نے فرمایا: ”اے عائشہ! یہ جبرائیل تمہیں سلام کہہ رہے ہیں،“ انہوں نے کہا: میں نے جواب دیا: ان پر بھی سلامتی ہو، اللہ تعالیٰ انہیں بہترین مہمان کے طور پر جزا عطا فرمائے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6871]