جابر بن عبداللہ رضی اللہ عنہما بیان فرماتے ہیں کہ ابو مذکور ایک آدمی تھا جو عذرہ قبیلہ سے تھا۔ اس کا ایک قبطی غلام تھا جسے اس نے مدبر کیا۔ نبی صلی اللہ علیہ وسلم نے اس غلام کے متعلق سنا تو آپ صلی اللہ علیہ وسلم نے اس غلام کو بیچ دیا اور فرمایا: ”جب تم میں سے کوئی فقیر ہو تو پہلے اپنے آپ سے ابتدا کرے، اگر مال زائد ہو تو اپنے ساتھ اپنے زیرِ کفالت لوگوں سے شروع کرے، پھر اس کے بعد اگر مال زائد پائے تو دوسروں پر صدقہ کر دے۔“ [مسند الشافعی/كِتَابُ العِتْقِ وَالوَلَاءِ وَالمُدَبَّرِ وَالمُكَاتَبِ وَحُسْنِ المَلَكَةِ/حدیث: 1091]

عمرو بن دینار سے روایت ہے کہ ایک آدمی نے اپنی موت کے بعد غلام کی آزادی کے لیے کہا جبکہ اس کے پاس اس کے علاوہ اور کوئی مال نہیں تھا۔ تو رسول اللہ صلی اللہ علیہ وسلم نے فرمایا: ”کون اس کو مجھ سے خریدے گا؟“ نعیم بن عبداللہ رضی اللہ عنہ نے اس کو آٹھ سو درہم کے بدلے خرید لیا، اور اس کی قیمت دے دی۔ [مسند الشافعی/كِتَابُ العِتْقِ وَالوَلَاءِ وَالمُدَبَّرِ وَالمُكَاتَبِ وَحُسْنِ المَلَكَةِ/حدیث: 1092]

ایک اور سند سے جابر بن عبداللہ رضی اللہ عنہما کے واسطہ سے نبی صلی اللہ علیہ وسلم سے سابقہ حدیث کی طرح مروی ہے۔ [مسند الشافعی/كِتَابُ العِتْقِ وَالوَلَاءِ وَالمُدَبَّرِ وَالمُكَاتَبِ وَحُسْنِ المَلَكَةِ/حدیث: 1093]

جابر رضی اللہ عنہ سے روایت ہے فرمایا: بنی عذرہ قبیلہ سے ایک آدمی نے اپنے غلام کو مدبّر بنا لیا، جب نبی صلی اللہ علیہ وسلم کو اطلاع ہوئی تو آپ صلی اللہ علیہ وسلم نے دریافت کیا: ”کیا تیرے پاس اس کے علاوہ بھی مال ہے؟“ تو اس نے کہا: ”نہیں۔“ پھر رسول اللہ صلی اللہ علیہ وسلم نے فرمایا: ”اس غلام کو مجھ سے کون خریدے گا؟“ نعیم بن عبداللہ العدوی رضی اللہ عنہ نے آٹھ سو درہم میں آپ صلی اللہ علیہ وسلم سے اسے خرید لیا، وہ اس رقم کو لے کر نبی صلی اللہ علیہ وسلم کے پاس آئے تو آپ صلی اللہ علیہ وسلم نے یہ قیمت مالک کے حوالے کر دی، پھر فرمایا: ”اپنے آپ سے ابتدا کر اور اس پر خرچ کر، اگر تیرے نفس سے کچھ بچ گیا تو اپنے گھر والوں پر، اگر پھر بھی کچھ بچ گیا تو اپنے رشتہ داروں کے لیے، اگر ان سے بھی بچ جائے تو ادھر ادھر، دائیں بائیں (یعنی دیگر مستحقین) پر خرچ کر۔“ [مسند الشافعی/كِتَابُ العِتْقِ وَالوَلَاءِ وَالمُدَبَّرِ وَالمُكَاتَبِ وَحُسْنِ المَلَكَةِ/حدیث: 1094]

جابر بن عبداللہ رضی اللہ عنہما بیان فرماتے ہیں: ہم میں سے ایک آدمی نے غلام کو مدبّر بنا لیا اور اس کے پاس اس غلام کے علاوہ اور مال نہ تھا، نبی صلی اللہ علیہ وسلم نے فرمایا: ”اس غلام کو مجھ سے کون خریدے گا؟“ اس کو نعیم بن نحام رضی اللہ عنہ نے خرید لیا۔ عمرو نے کہا: میں نے جابر رضی اللہ عنہ کو فرماتے ہوئے سنا کہ وہ ایک قبطی غلام تھا اور عبداللہ بن زبیر رضی اللہ عنہما کی خلافت کے پہلے سال فوت ہوا۔ ابوزبیر نے یہ الفاظ زیادہ بیان کیے کہ اس کا نام یعقوب تھا۔ [مسند الشافعی/كِتَابُ العِتْقِ وَالوَلَاءِ وَالمُدَبَّرِ وَالمُكَاتَبِ وَحُسْنِ المَلَكَةِ/حدیث: 1095]

امام شافعی رحمہ اللہ نے فرمایا: میں نے ان سے اپنے دور میں عموماً اسی طرح سنا، پھر میں نے اپنی کتاب میں پایا کہ ”ہم میں سے ایک آدمی نے غلام مدبر کیا اور وہ مر گیا“، یہ (عبارت) یا تو میری کتاب کی غلطی ہے یا سفیان رحمہ اللہ سے غلطی ہوئی ہے۔ اگر یہ غلطی سفیان رحمہ اللہ کی طرف سے ہے تو پھر ابن جریح، ابوالزبیر کی حدیث کو سفیان سے زیادہ یاد رکھنے والے ہیں اور پھر ابن جریح کے ساتھ لیث اور دیگر بھی یہی (ابن جریح والی) حدیث بیان کرتے ہیں۔ اور ابوالزبیر حدیث میں مدبر کی زندگی کی حد بھی بتاتے ہیں۔ اور حماد بن زید، حماد بن سلمہ اور ان کے علاوہ دوسرے (راوی) عمرو کی حدیث کو اکیلے سفیان سے زیادہ یاد رکھنے والے ہیں۔ حدیث کے حفظ پر استدلال ان غلطیوں کی وجہ سے کیا جاتا ہے جو میں نے ابن جریح اور لیث کی ابوالزبیر کے واسطہ سے حدیث میں پائی ہیں۔ اور حماد کی حدیث میں جو عمرو کے واسطہ سے ہے، اور حماد کے علاوہ بھی جو عمرو سے روایت ہے، اسے ویسے ہی بیان کرتے ہیں جیسا کہ حماد بن زید نے اس کو بیان کیا ہے۔ اور سفیان بن عیینہ سے پہلے ملاقات کرنے والوں میں سے مجھے کئی ایک نے بتایا کہ وہ اپنی حدیث میں لفظ ”مات“ (وہ مر گیا) بیان نہیں کرتے تھے۔ اور جب میں نے ان کو بتایا کہ میں نے اپنی کتاب میں لفظ ”مات“ پایا ہے تو ان میں سے بعض نے تعجب کیا۔ امام شافعی رحمہ اللہ نے فرمایا: شاید یہ ان کی غلطی یا لغزش ہے جو میں نے ان سے یاد کی ہے۔ [مسند الشافعی/كِتَابُ العِتْقِ وَالوَلَاءِ وَالمُدَبَّرِ وَالمُكَاتَبِ وَحُسْنِ المَلَكَةِ/حدیث: 1096]

عمرہ سے روایت ہے کہ عائشہ رضی اللہ عنہا کی ایک لونڈی تھی جسے انہوں نے مدبر کیا، اس لونڈی نے ان پر جادو کر دیا اور پھر اس نے جادو کا اعتراف بھی کر لیا۔ تو عائشہ رضی اللہ عنہا نے اس کے متعلق حکم دیا کہ اس کو ان دیہاتیوں کے پاس بیچ دیا جائے جو اپنے غلاموں سے برا سلوک کرتے ہیں، چنانچہ وہ بیچ دی گئی۔ [مسند الشافعی/كِتَابُ العِتْقِ وَالوَلَاءِ وَالمُدَبَّرِ وَالمُكَاتَبِ وَحُسْنِ المَلَكَةِ/حدیث: 1097]