سیدنا جابر رضی اللہ عنہ سے روایت ہے، انہوں نے کہا: ”ایک شخص کو اس کے سینے یا حلق میں ایک تیر آ لگا اور وہ فوت ہو گیا تو اسے اسی طرح اس کے کپڑوں میں لپیٹ دیا گیا۔“ کہتے ہیں: ”(اس واقعہ میں) ہم رسول اللہ صلی اللہ علیہ وسلم کے ساتھ تھے۔“ [سنن ابي داود/كِتَاب الْجَنَائِزِ/حدیث: 3133]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے شہدائے احد کے متعلق فرمایا تھا: ”ان کے ہتھیار اور (چمڑے کی) پوستین اتار لیے جائیں اور انہیں ان کے خونوں اور کپڑوں ہی میں دفن کیا جائے۔“ یہ الفاظ زیاد بن ایوب کے ہیں۔ [سنن ابي داود/كِتَاب الْجَنَائِزِ/حدیث: 3134]

سیدنا انس رضی اللہ عنہ نے بیان کیا کہ ”شہدائے احد کو غسل نہیں دیا گیا، انہیں ان کے خونوں کے ساتھ ہی دفن کر دیا گیا اور جنازہ بھی نہیں پڑھا گیا۔“ [سنن ابي داود/كِتَاب الْجَنَائِزِ/حدیث: 3135]

سیدنا انس رضی اللہ عنہ سے مروی ہے کہ رسول اللہ صلی اللہ علیہ وسلم سیدنا حمزہ رضی اللہ عنہ کے پاس سے گزرے جب کہ ان کا مثلہ کیا گیا تھا (ان کی نعش سے ناک اور کان وغیرہ کاٹ لیے گئے تھے) تو آپ صلی اللہ علیہ وسلم نے فرمایا: ”اگر یہ بات نہ ہو کہ (ان کی بہن) صفیہ رضی اللہ عنہا سے برداشت نہیں ہو سکے گا تو میں اسے (سیدنا حمزہ رضی اللہ عنہ کی نعش کو) ایسے ہی چھوڑ دوں حتیٰ کہ اسے درندے اور پرندے کھا جائیں اور پھر یہ ان کے پیٹوں ہی سے محشر میں آئیں“ اور (احد میں) کپڑے کم پڑ گئے اور مقتولین کی تعداد بہت زیادہ ہو گئی تو ایک ایک، دو دو اور تین تین کو ایک ہی کپڑے میں کفن دیا گیا۔ قتیبہ نے مزید کہا: ”اور ایک ایک قبر میں دفن کیے گئے۔“ رسول اللہ صلی اللہ علیہ وسلم ان کے متعلق دریافت فرماتے جاتے تھے کہ ”ان میں سے قرآن کس کو زیادہ یاد ہے؟“ پھر اسے قبلہ کی جانب آگے کر دیتے تھے۔ [سنن ابي داود/كِتَاب الْجَنَائِزِ/حدیث: 3136]

سیدنا انس رضی اللہ عنہ سے روایت ہے کہ ”نبی کریم صلی اللہ علیہ وسلم سیدنا حمزہ رضی اللہ عنہ کے پاس سے گزرے (اور دیکھا کہ) ان کا مثلہ کیا گیا ہے تو آپ صلی اللہ علیہ وسلم نے ان کے سوا کسی اور کا جنازہ نہیں پڑھا۔“ [سنن ابي داود/كِتَاب الْجَنَائِزِ/حدیث: 3137]

سیدنا جابر بن عبداللہ رضی اللہ عنہ نے بیان کیا کہ رسول اللہ صلی اللہ علیہ وسلم شہدائے احد میں سے دو دو آدمیوں کو اکٹھا کرتے اور دریافت فرماتے: ”ان میں قرآن کسے زیادہ یاد ہے؟“ جب کسی ایک کی طرف اشارہ کیا جاتا، تو آپ صلی اللہ علیہ وسلم اسے لحد میں آگے رکھتے اور آپ صلی اللہ علیہ وسلم نے فرمایا: ”میں قیامت کے روز ان کے لیے گواہ ہوں گا۔“ آپ صلی اللہ علیہ وسلم نے حکم دیا کہ انہیں ان کے خونوں ہی میں دفن کیا جائے اور انہیں غسل نہیں دیا۔ [سنن ابي داود/كِتَاب الْجَنَائِزِ/حدیث: 3138]

سیدنا لیث رحمہ اللہ نے اس حدیث کو مذکورہ بالا حدیث کے ہم معنی روایت کیا اور کہا کہ ”آپ صلی اللہ علیہ وسلم نے شہدائے احد میں سے دو دو آدمیوں کو ایک ایک کفن میں اکٹھا کیا۔“ [سنن ابي داود/كِتَاب الْجَنَائِزِ/حدیث: 3139]