سیدہ ام قیس بنت محصن رضی اللہ عنہا بیان کرتی ہیں کہ میں اپنے بیٹے کو لے کر رسول اللہ صلی اللہ علیہ وسلم کی خدمت میں حاضر ہوئی۔ (چونکہ اس کے حلق میں تکلیف تھی تو) میں نے اس کے لٹکے ہوئے گلے انگلی سے اوپر کیے تھے۔ رسول اللہ صلی اللہ علیہ وسلم نے فرمایا: ”تم اپنے بچوں کے گلے لٹکنے کا علاج انگلی سے کیوں کرتی ہو؟ «عُودِ هِنْدِي» ”عودِ ہندی“ اختیار کر لو، اس میں سات بیماریوں کی شفاء ہے۔ ان میں سے ایک «ذَاتِ الْجَنْبِ» ”ذات الجنب“ (پہلو کا درد بھی) ہے (جس میں یہ مفید ہے) حلق کی تکلیف میں اسے ناک میں ٹپکایا جاتا ہے اور پہلو کے درد میں پانی کے ساتھ کھلایا جاتا ہے۔“ امام ابوداؤد رحمہ اللہ کہتے ہیں کہ عود سے مراد «قُسْط» ”قسط“ ہے۔ [سنن ابي داود/كِتَاب الطِّبِّ/حدیث: 3877]