جناب سہل بن معاذ اپنے والد رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے فرمایا: ”جو شخص غصہ پی جائے جبکہ وہ اس پر عمل درآمد کی قدرت رکھتا ہو تو اللہ اسے قیامت کے دن برسرِ مخلوق بلائے گا اور اسے اختیار دے گا کہ جنت کی حورِ عین میں سے جسے چاہے منتخب کر لے۔“ امام ابوداؤد رحمہ اللہ فرماتے ہیں کہ: ”سند کے راوی ابو مرحوم کا نام عبدالرحمٰن بن میمون ہے۔“ [سنن ابي داود/كِتَاب الْأَدَبِ/حدیث: 4777]

اصحابِ نبی کریم صلی اللہ علیہ وسلم میں سے کسی کے بیٹے نے اپنے والد (رضی اللہ عنہ) سے بیان کیا کہ رسول اللہ صلی اللہ علیہ وسلم نے فرمایا، اور مندرجہ بالا حدیث کی مانند ذکر کیا (اور) کہا: ”اللہ اسے امن اور ایمان سے بھر دے گا۔“ مگر اس میں یہ نہیں: ”اللہ اسے بلائے گا۔“ مزید کہا: ”جس شخص نے زینت اور جمال والا لباس ترک کیا، حالانکہ وہ اس کی استطاعت رکھتا ہو۔“ بشر بن منصور نے کہا: میرا خیال ہے کہ آپ نے فرمایا: ”وہ اس نے تواضع کی وجہ سے چھوڑا ہو تو اللہ اسے عزت اور کرامت کا جوڑا پہنائے گا، اور جس نے اللہ کی رضا کے لیے نکاح کر دیا ہو تو اللہ اسے تاجِ شاہی پہنائے گا۔“ [سنن ابي داود/كِتَاب الْأَدَبِ/حدیث: 4778]

سیدنا عبداللہ بن مسعود رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”تم لوگ زبردست پہلوان (بہت زیادہ پچھاڑنے والا) کسے کہتے ہو؟“ صحابہ رضی اللہ عنہم نے کہا: ”جسے لوگ پچھاڑ نہ سکیں۔“ آپ صلی اللہ علیہ وسلم نے فرمایا: ”نہیں پہلوان وہ ہے جو غصے کی حالت میں اپنے آپ کو قابو میں رکھے۔“ [سنن ابي داود/كِتَاب الْأَدَبِ/حدیث: 4779]