جناب سہیل بن ابی صالح کہتے ہیں کہ ”میں اپنے والد کے پاس بیٹھا ہوا تھا، ان کے پاس ایک غلام بھی تھا۔ تو وہ اٹھ کر گیا اور پھر واپس آ گیا تو میرے والد نے سیدنا ابوہریرہ رضی اللہ عنہ سے حدیث بیان کی کہ نبی کریم صلی اللہ علیہ وسلم نے فرمایا: ”جو شخص اپنی جگہ سے اٹھ کر جائے اور پھر واپس لوٹ آئے تو وہی اس جگہ کا زیادہ حقدار ہے۔““ [سنن ابي داود/كِتَاب الْأَدَبِ/حدیث: 4853]

جناب کعب ایادی رضی اللہ عنہ کہتے ہیں کہ ”میں سیدنا ابودرداء رضی اللہ عنہ کے ہاں آیا جایا کرتا تھا۔“ تو سیدنا ابودرداء رضی اللہ عنہ نے بیان کیا کہ ”جب رسول اللہ صلی اللہ علیہ وسلم (کسی جگہ) تشریف فرما ہوتے اور ہم بھی آپ صلی اللہ علیہ وسلم کے اردگرد بیٹھ جاتے، تو اگر آپ صلی اللہ علیہ وسلم اٹھ کر جاتے اور واپس آنے کا ارادہ رکھتے تو اپنا جوتا یا جو کچھ آپ پر (کپڑا وغیرہ) ہوتا، وہاں چھوڑ جاتے، اس سے صحابہ کرام رضی اللہ عنہم آپ صلی اللہ علیہ وسلم کے واپس آنے کے متعلق جان جاتے اور بیٹھے رہتے۔“ [سنن ابي داود/كِتَاب الْأَدَبِ/حدیث: 4854]