حضرت ام سلمہ رضی اللہ عنہا سے روایت ہے، انہوں نے بیان کیا کہ میں نے کہا: ”اے اللہ کے رسول! میں سر کے بالوں کی مینڈھیاں مضبوطی سے بناتی ہوں، تو کیا غسل جنابت کے لیے انہیں کھولا کروں؟“ آپ صلی اللہ علیہ وسلم نے فرمایا: ”تجھے یہی کافی ہے کہ سر پر پانی کی تین لپیں ڈال لے، پھر اپنے (پورے جسم) پر پانی بہا لے، تو پاک ہو جائے گی۔“ یا فرمایا: ”بس تو پاک ہو گئی۔“ [سنن ابن ماجه/أبواب التيمم/حدیث: 603]

حضرت عبید بن عمیر رحمہ اللہ سے روایت ہے، انہوں نے کہا: حضرت عائشہ رضی اللہ عنہا کو معلوم ہوا کہ حضرت عبداللہ بن عمرو رضی اللہ عنہ اپنی خواتین کو حکم دیتے ہیں کہ جب وہ غسل کریں تو سر (کی مینڈھیاں وغیرہ) کھول لیا کریں۔ ام المومنین رضی اللہ عنہا نے فرمایا: ”عبداللہ بن عمرو پر تعجب ہے! (کہ وہ عورتوں کو غسل کے لیے بال کھولنے کا حکم دیتے ہیں) وہ انہیں یہ حکم کیوں نہیں دیتے کہ اپنے سر منڈوا لیا کریں۔ میں اور رسول اللہ صلی اللہ علیہ وسلم ایک ہی برتن میں غسل کرتے تھے، میں تو اس سے زیادہ نہیں کرتی تھی کہ اپنے سر پر تین بار پانی ڈال لیتی تھی۔“ (نبی صلی اللہ علیہ وسلم مجھے بال کھولنے کا حکم نہیں دیتے تھے۔) [سنن ابن ماجه/أبواب التيمم/حدیث: 604]