حضرت عتاب بن اسید رضی اللہ عنہ سے روایت ہے کہ نبی صلی اللہ علیہ وسلم ”لوگوں کے پاس آدمی بھیجتے تھے تو وہ ان کے انگوروں اور پھلوں (کی مقدار) کا اندازہ لگاتا تھا۔“ [سنن ابن ماجه/كتاب الزكاة/حدیث: 1819]

حضرت عبداللہ بن عباس رضی اللہ عنہ سے روایت ہے کہ جب نبی صلی اللہ علیہ وسلم نے خیبر فتح کیا تو ان سے یہ طے کیا کہ زمین اور تمام سونا چاندی نبی صلی اللہ علیہ وسلم کا ہو گا۔ خیبر والوں نے کہا: ”ہم لوگ زمین (کی کاشت اور دیکھ بھال) سے زیادہ واقف ہیں تو یہ زمین ہمیں (کاشت کے لیے) اس شرط پر دے دیجئے کہ ہم اس میں (زراعت کا) کام کریں اور پھلوں کا نصف ہمارا ہو، نصف تمہارا۔“ راوی بیان کرتے ہیں کہ آپ صلی اللہ علیہ وسلم نے انہیں اس شرط پر وہ زمین دے دی۔ جب کھجوروں کے پھل اتارنے کا وقت آیا تو آپ صلی اللہ علیہ وسلم نے حضرت عبداللہ بن رواحہ رضی اللہ عنہ کو ان کے پاس بھیجا۔ انہوں نے کھجوروں (کے پھل) کا اندازہ لگایا، مدینے والے اندازہ لگانے کو «الْخَرْصُ» کہتے تھے، اور فرمایا: ”اس باغ میں اتنا پھل ہے۔“ انہوں نے کہا: ”اے ابن رواحہ رضی اللہ عنہ! آپ نے (صحیح مقدار سے) زیادہ اندازہ لگایا ہے۔“ انہوں نے فرمایا: ”تب میں کھجوروں کا اندازہ لگا کر جو مقدار معین کرتا ہوں اس کا نصف تمہیں دے دوں گا۔“ انہوں (یہودیوں) نے کہا: ”یہی حق ہے، اسی پر آسمان اور زمین قائم ہیں۔“ اور کہا: ”ہم اتنا ہی لینے پر راضی ہیں جتنا آپ کہتے ہیں۔“ [سنن ابن ماجه/كتاب الزكاة/حدیث: 1820]