زیاد بن سعد بن ضمیرہ رحمہ اللہ سے روایت ہے، انہوں نے کہا: ”مجھے میرے والد (سعد بن ضمیرہ رضی اللہ عنہ) اور میرے چچا نے حدیث سنائی۔ یہ دونوں غزوہ حنین میں رسول اللہ صلی اللہ علیہ وسلم کے ساتھ حاضر تھے، ان دونوں نے فرمایا: نبی صلی اللہ علیہ وسلم نے ظہر کی نماز پڑھائی، پھر ایک درخت کے نیچے بیٹھ گئے۔ قبیلہ خندف کے سردار اقرع بن حابس رضی اللہ عنہ اٹھ کر نبی صلی اللہ علیہ وسلم کے پاس آئے اور محلم بن جثامہ کے قتل کے بارے میں گفتگو کرنے لگے۔ عیینہ بن حصن رضی اللہ عنہ بھی حاضر خدمت ہو کر قبیلہ اشجع کے فرد عامر بن اضبط کے قصاص کا مطالبہ کرنے لگے۔ نبی صلی اللہ علیہ وسلم نے انہیں فرمایا: ”کیا تم دیت (خون بہا) لینے پر راضی ہو؟“ انہوں نے انکار کیا۔ قبیلہ بنو لیث کا ایک آدمی جسے مکیتل کہتے تھے، اس نے اٹھ کر عرض کیا: ”اے اللہ کے رسول صلی اللہ علیہ وسلم ! اللہ کی قسم میں تو اسلام کے شروع زمانے کے اس مقتول کی مثال اس طرح سمجھتا ہوں جیسے بکریوں کا ریوڑ پانی پینے آیا، اس کو کنکر مارا گیا تو ریوڑ کا پچھلا حصہ بھاگ اٹھا۔“ نبی صلی اللہ علیہ وسلم نے فرمایا: ”تمہیں ہمارے اس سفر میں پچاس اونٹ مل جائیں گے اور پچاس واپسی پر مل جائیں گے۔“ اس پر ان لوگوں نے دیت لینا منظور کر لیا۔“ [سنن ابن ماجه/كتاب الديات/حدیث: 2625]

عمرو بن شعیب نے اپنے والد سے اور انہوں نے اپنے دادا عبداللہ بن عمرو بن عاص رضی اللہ عنہ سے روایت کی کہ رسول اللہ صلی اللہ علیہ وسلم نے فرمایا: ”جس نے جان بوجھ کر قتل کیا، اسے مقتول کے وارثوں کے حوالے کر دیا جائے گا، وہ چاہیں تو (قصاص کے طور پر) قتل کر دیں، چاہیں تو دیت لے لیں۔ اور دیت کی مقدار تین سالہ تیس اونٹنیاں، اور چار سالہ تیس اونٹنیاں اور چالیس حاملہ اونٹنیاں (کل تعداد سو) ہے۔ یہ قتلِ عمد کی دیت ہے۔ اگر (اس سے کم) کسی مقدار پر صلح ہو جائے تو انہیں اس کا حق حاصل ہے۔ اور یہ سخت (مغلظہ) دیت ہے۔“ [سنن ابن ماجه/كتاب الديات/حدیث: 2626]