حضرت قبیصہ بن ذؤیب بن حلحلہ رضی اللہ عنہ سے روایت ہے، انہوں نے فرمایا: ایک نانی وراثت (میں سے حصہ دلوائے جانے) کا مطالبہ لے کر حضرت ابوبکر صدیق رضی اللہ عنہ کی خدمت میں حاضر ہوئی تو حضرت ابوبکر صدیق رضی اللہ عنہ نے اسے فرمایا: ”اللہ کی کتاب (قرآن مجید) میں تو تیرا کوئی حصہ مذکور نہیں اور رسول اللہ صلی اللہ علیہ وسلم کی سنت میں بھی تیرا کوئی حصہ میرے علم میں نہیں، اس لیے (فی الحال) واپس چلی جا حتیٰ کہ میں لوگوں (صحابہ کرام رضی اللہ عنہم) سے دریافت کر لوں۔“ (اس کے بعد) حضرت ابوبکر صدیق رضی اللہ عنہ نے لوگوں سے دریافت کیا تو حضرت مغیرہ بن شعبہ رضی اللہ عنہ نے کہا: ”رسول اللہ صلی اللہ علیہ وسلم نے میری موجودگی میں نانی کو چھٹا حصہ دیا تھا۔“ حضرت ابوبکر رضی اللہ عنہ نے فرمایا: ”کیا تمہارے ساتھ کوئی اور بھی (گواہ) ہے؟“ حضرت محمد بن مسلمہ رضی اللہ عنہ نے کھڑے ہو کر وہی بات کہی جو حضرت مغیرہ بن شعبہ رضی اللہ عنہ نے کہی تھی، چنانچہ حضرت ابوبکر رضی اللہ عنہ نے فیصلہ اس خاتون کے حق میں صادر فرما دیا۔ اس کے بعد ایک دادی، باپ سے تعلق رکھنے والی، حضرت عمر رضی اللہ عنہ کے پاس اپنی میراث (کے حصے) کا مطالبہ لے کر آئی تو حضرت عمر رضی اللہ عنہ نے فرمایا: ”اللہ کی کتاب میں تیرا کوئی حصہ مذکور نہیں، اور جو فیصلہ حضرت ابوبکر رضی اللہ عنہ کے زمانہ مبارک میں کیا گیا تھا وہ تیرے لیے نہیں تھا۔ اور میں مقرر حصوں میں کوئی اضافہ نہیں کر سکتا، البتہ وہی چھٹا حصہ ہے۔ اگر (دادی اور نانی) دونوں اس میں شریک ہو جاؤ تو وہ تمہارے درمیان (نصف نصف) ہو گا۔ ورنہ تم دونوں میں سے جو ہو گی، وہ (حصہ) اس کا ہو گیا۔“ [سنن ابن ماجه/كتاب الفرائض/حدیث: 2724]

حضرت عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے ”جدہ (نانی یا دادی) کو وراثت میں چھٹا حصہ دیا۔“ [سنن ابن ماجه/كتاب الفرائض/حدیث: 2725]