حضرت جابر بن عبد اللہ رضی اللہ عنہ، حضرت عبد اللہ بن عمر رضی اللہ عنہ اور حضرت عبد اللہ بن عباس رضی اللہ عنہم سے روایت ہے کہ ”رسول اللہ صلی اللہ علیہ وسلم اور آپ صلی اللہ علیہ وسلم کے صحابہ رضی اللہ عنہم جب (مکہ مکرمہ) تشریف لائے تو انہوں نے اپنے حج اور عمرے (دونوں) کے لیے صرف ایک ہی طواف کیا تھا“۔ [سنن ابن ماجه/كتاب المناسك/حدیث: 2972]

حضرت جابر رضی اللہ عنہ سے روایت ہے کہ نبی صلی اللہ علیہ وسلم نے ”حج اور عمرے کے لیے ایک ہی طواف کیا۔“ [سنن ابن ماجه/كتاب المناسك/حدیث: 2973]

حضرت عبداللہ بن عمر رضی اللہ عنہ سے روایت ہے کہ وہ حجِ قران کی نیت سے تشریف لائے تو انہوں نے بیت اللہ کے طواف کے سات چکر لگائے اور صفا اور مروہ کے درمیان سعی کی، پھر فرمایا: ”رسول اللہ صلی اللہ علیہ وسلم نے اسی طرح کیا تھا۔“ [سنن ابن ماجه/كتاب المناسك/حدیث: 2974]

حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جس نے حج اور عمرے کا اکٹھا احرام باندھا، اسے ان دونوں کے لیے ایک ہی طواف کافی ہے، اور وہ احرام نہیں کھولے گا حتی کہ حج پورا کر لے اور دونوں سے اکٹھا احرام کھولے۔“ [سنن ابن ماجه/كتاب المناسك/حدیث: 2975]