حضرت عبداللہ بن عمر رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”جس شخص نے شراب پی اور اسے نشہ ہو گیا، اس کی چالیس دن نماز قبول نہیں ہو گی اور اگر وہ (توبہ کیے بغیر) مر گیا تو جہنم میں جائے گا۔ اگر اس نے توبہ کی تو اللہ تعالیٰ اس کی توبہ قبول فرمائے گا۔ اگر اس نے دوبارہ شراب پی لی اور اسے نشہ ہو گیا تو اس کی نماز (مزید) چالیس دن قبول نہ ہو گی۔ اگر (اس اثنا میں) وہ (توبہ کیے بغیر) مر گیا تو جہنم میں داخل ہو گا۔ اگر اس نے پھر (تیسری بار) شراب پی اور اسے نشہ ہو گیا تو اس کی نماز (مزید) چالیس دن قبول نہیں ہو گی۔ اگر وہ مر گیا تو جہنم میں داخل ہو گا۔ اور اگر اس نے توبہ کر لی تو اللہ تعالیٰ اس کی توبہ قبول فرمائے گا۔ اگر اس نے پھر (چوتھی بار) شراب پی تو اللہ تعالیٰ نے (ایسے شخص کے بارے میں) پختہ فیصلہ کر لیا ہے کہ اسے قیامت کے دن گندی کیچڑ پلائے گا۔“ صحابہ کرام رضی اللہ عنہم نے عرض کیا: ”اے اللہ کے رسول صلی اللہ علیہ وسلم ! گندی کیچڑ سے کیا مراد ہے؟“ آپ صلی اللہ علیہ وسلم نے فرمایا: ”جہنمیوں کی پیپ اور گندگی۔“ [سنن ابن ماجه/كتاب الأشربة/حدیث: 3377]