حضرت عائشہ رضی اللہ عنہا سے روایت ہے، انہوں نے فرمایا: میں حضرت ابوبکر رضی اللہ عنہ کے پاس حاضر ہوئی تو انہوں نے فرمایا: تم نے نبی کریم صلی اللہ علیہ وسلم کو کتنے کپڑوں میں کفن دیا تھا؟ میں نے جواب دیا: تین سحولی چادروں میں، جن میں نہ قمیص تھی اور نہ عمامہ ہی تھا۔ پھر انہوں نے فرمایا: نبی کریم صلی اللہ علیہ وسلم نے کس روز وفات پائی تھی؟ حضرت عائشہ رضی اللہ عنہا نے کہا: پیر کے دن۔ حضرت ابوبکر رضی اللہ عنہ نے فرمایا: آج کون سا دن ہے؟ انہوں نے جواب دیا: آج پیر کا دن ہے۔ حضرت ابوبکر رضی اللہ عنہ نے فرمایا: میں امید کرتا ہوں کہ اس وقت سے لے کر رات تک وفات پا جاؤں گا۔ پھر انہوں نے اپنے کپڑے کی طرف دیکھا جس میں وہ بیمار ہوئے تھے اور اس میں ایک زعفران کا نشان تھا، آپ نے فرمایا کہ میرے اسی کپڑے کو دھو ڈالو، اسی پر دو چادروں کا اضافہ کر دو اور ان میں مجھے کفن دینا، میں نے کہا: یہ کپڑا تو پرانا ہے۔ انہوں نے فرمایا: زندہ آدمی نئے کپڑوں کا مردے سے زیادہ حقدار ہے، کیونکہ آخر کار کفن تو پیپ کی نذر ہونے والا ہے۔ پھر منگل کی رات انہوں نے وفات پائی اور صبح سے پہلے پہلے دفن کر دیے گئے۔ [صحيح البخاري/كِتَاب الْجَنَائِزِ/حدیث: 1387]