حضرت عبداللہ بن عمر رضی اللہ عنہما سے روایت ہے، وہ نبی کریم صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”جو کھیتی بارش یا چشمے کے پانی سے سیراب ہو یا وہ زمین جو خود بخود سیراب ہو، اس میں دسواں حصہ لیا جائے اور جو کھیتی کنویں کے پانی سے سینچی جائے اس سے بیسواں حصہ لیا جائے۔“ امام بخاری رحمہ اللہ فرماتے ہیں کہ یہ پہلی حدیث کی تفسیر ہے کیونکہ پہلی حدیث، یعنی ابن عمر رضی اللہ عنہما سے مروی وہ حدیث کہ ”جو کھیتی بارش سے سیراب ہو اس میں دسواں حصہ ہے“، اس میں نصاب کا تعین نہیں ہے اور اس حدیث میں نصاب کو بیان کیا گیا ہے، اور ثقہ راوی کا اضافہ قبول ہوتا ہے، اور مفسر روایت مبہم روایت کا فیصلہ کرتی ہے جبکہ اسے اہل ثبت، یعنی ثقہ راوی بیان کریں جیسا کہ حضرت فضل بن عباس رضی اللہ عنہما سے روایت ہے کہ نبی کریم صلی اللہ علیہ وسلم نے کعبہ میں نماز نہیں پڑھی اور حضرت بلال رضی اللہ عنہ نے بیان کیا ہے کہ رسول اللہ صلی اللہ علیہ وسلم نے کعبہ میں نماز پڑھی ہے، حضرت بلال رضی اللہ عنہ کے بیان کو قبول کر لیا گیا ہے اور حضرت فضل بن عباس رضی اللہ عنہما کے قول کو چھوڑ دیا گیا ہے۔ [صحيح البخاري/كِتَاب الزَّكَاة/حدیث: 1483]