سیدنا ابوسعید رضی اللہ عنہ سے روایت ہے کہ رسول اللہ صلی اللہ علیہ وسلم نے پکارا سیدنا ابی بن کعب رضی اللہ عنہ کو اور وہ نماز پڑھ رہے تھے، تو جب نماز سے فارغ ہوئے مل گئے آپ صلی اللہ علیہ وسلم سے، پس رکھا رسول اللہ صلی اللہ علیہ وسلم نے ہاتھ اپنا سیدنا اُبی رضی اللہ عنہ کے ہاتھ پر، اور وہ نکلناچاہتے تھے مسجد کے دروازے سے، سو فرمایا آپ صلی اللہ علیہ وسلم نے: ”میں چاہتا ہوں کہ نہ نکلے تو مسجد کے دروازے سے یہاں تک کہ سیکھ لے ایک سورت ایسی کہ نہیں اُتری توریت اور انجیل اور قرآن میں مثل اس کے۔“ کہا سیدنا اُبی رضی اللہ عنہ نے: پس ٹھہر ٹھہر کر چلنے لگا میں اسی امید میں، پھر کہا میں نے: اے رسول اللہ صلی اللہ علیہ وسلم ! وہ سورت جس کا آپ نے وعدہ کیا تھا سکھلایئے مجھ کو۔ فرمایا آپ صلی اللہ علیہ وسلم نے: ”کیونکر پڑھتا ہے تو جب شروع کرتا ہے نماز کو؟“ کہا سیدنا ابی رضی اللہ عنہ نے: تو میں پڑھنے لگا « ﴿الْحَمْدُ لِلّٰهِ رَبِّ الْعَالَمِينَ﴾ » یہاں تک کہ ختم کیا میں نے سورت کو۔ پس فرمایا رسول اللہ صلی اللہ علیہ وسلم نے: ”وہ یہی سورت ہے، اور یہ سورت سبع مثانی اور قرآن عظیم ہے جو میں دیا گیا۔“ [موطا امام مالك رواية يحييٰ/حدیث: 184]

حضرت ابی نعیم وہب بن کیسان سے روایت ہے کہ انہوں نے سنا سیدنا جابر بن عبداللہ انصاری رضی اللہ عنہ سے، کہتے تھے: جس شخص نے ایک رکعت پڑھی اور اس میں سورۂ فاتحہ نہ پڑھی تو گویا اس نے نماز نہ پڑھی، مگر جب امام کے پیچھے ہو۔ [موطا امام مالك رواية يحييٰ/حدیث: 185]

سیدنا ابوہریرہ رضی اللہ عنہ سے روایت ہے کہ فرمایا نبی صلی اللہ علیہ وسلم نے: ”جس شخص نے نماز پڑھی اور نہ پڑھی اس میں سورۂ فاتحہ، تو نماز اس کی ناقص ہے، ناقص ہے، ناقص ہے، ہرگز تمام نہیں ہے۔“ ابوسائب نے کہا: اے سیدنا ابوہریرہ رضی اللہ عنہ! کبھی میں امام کے پیچھے ہوتا ہوں، تو دبا دیا سیدنا ابوہریرہ رضی اللہ عنہ نے میرا بازو اور کہا: پڑھ لے اپنے دل میں اے فارس کے رہنے والے! کیونکہ میں نے سنا ہے رسول اللہ صلی اللہ علیہ وسلم سے، فرماتے تھے: فرمایا اللہ تعالیٰ نے: ”بٹ گئی نماز میرے اور میرے بندے کے بیچ میں آدھوں آدھ، آدھی میری اور آدھی اس کی، اور جو بندہ میرا مانگے اس کو دوں گا۔“ فرمایا رسول اللہ صلی اللہ علیہ وسلم نے: ”پڑھو، بندہ کہتا ہے: تعریف اللہ کو ہے جو صاحب ہے سارے جہان کا، پروردگار کہتا ہے: ”میری تعریف کی میرے بندے نے۔“ بندہ کہتا ہے: بڑی رحمت کرنے والامہربان، پروردگار کہتا ہے: ”خوبی بیان کی میرے بندے نے۔“ بندہ کہتا ہے: مالک بدلے کے دن کا، پروردگار کہتا ہے: ”بڑائی کی میری میرے بندے نے۔“ بندہ کہتا ہے: خاص تجھ کو پوجتے ہیں ہم اور تجھی سے مدد چاہتے ہیں ہم، ”تو یہ آیت میرے اور میرے بندے کے بیچ میں ہے“ (یعنی پروردگار کی عظمت ہے اور بندے کی طرف اقرار ہے بندگی کا)۔ بندہ کہتا ہے: دکھا ہم کو سیدھی راہ، اُن لوگوں کی راہ جن پر تو نے اپناکرم کیا، نہ دشمنوں کی اور گمراہوں کی، ”تو یہ آیتیں بندہ کے لیے ہیں اور میرا بندہ جو مانگے سو دوں۔“ [موطا امام مالك رواية يحييٰ/حدیث: 186]

حضرت عروہ بن زبیر سورۂ فاتحہ پڑھتے تھے امام کے پیچھے سری نماز میں۔ [موطا امام مالك رواية يحييٰ/حدیث: 187]

ربیعہ بن ابی عبدالرحمٰن رحمہ اللہ سے روایت ہے کہ بےشک قاسم بن محمد بن ابی بکر صدیق امام کے پیچھے اس نماز میں قرأت کرتے تھے جس میں امام بلند آواز سے قرأت نہیں کرتا تھا۔ [موطا امام مالك رواية يحييٰ/حدیث: 188]

حضرت نافع بن جبیر امام کے پیچھے سری نماز میں سورۂ فاتحہ پڑھتے تھے۔
امام مالک رحمہ اللہ نے کہا کہ مجھے یہ اثر بہت پسند ہے اُن روایتوں میں جو میں نے اس باب میں سنیں۔ [موطا امام مالك رواية يحييٰ/حدیث: 189]

حضرت نافع سے روایت ہے کہ سیدنا عبداللہ بن عمر رضی اللہ عنہما سے جب کوئی پوچھتا کہ سورۂ فاتحہ پڑھی جائے امام کے پیچھے؟ تو جواب دیتے کہ جب کوئی تم میں سے نماز پڑھے امام کے پیچھے تو کافی ہے اس کو قراءت امام کی، اور جو اکیلے پڑھے تو پڑھ لے۔ کہا نافع نے: اور تھے سیدنا عبداللہ بن عمر رضی اللہ عنہما نہیں پڑھتے پیچھے امام کے۔
امام مالک رحمہ اللہ نے فرمایا: ہمارے نزدیک یہ حکم ہے کہ نماز جہری میں امام کے پیچھے سورۂ فاتحہ نہ پڑھے، اور سرّی میں پڑھے۔ [موطا امام مالك رواية يحييٰ/حدیث: 190]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم فارغ ہوئے ایک نماز جہری سے پھر فرمایا: ”کیا تم میں سے کسی نے میرے ساتھ کلام اللہ پڑھا تھا۔“ ایک شخص بول اُٹھا کہ ہاں میں نے یا رسول اللہ صلی اللہ علیہ وسلم ۔ فرمایا آپ صلی اللہ علیہ وسلم نے: ”جب ہی میں کہتا تھا اپنے دل میں کیا ہوا ہے مجھ کو چھینا جاتا ہے مجھ سے کلام اللہ۔“ کہا ابن شہاب نے یا سیدنا ابوہریرہرضی اللہ عنہ نے: تب لوگوں نے موقوف کیا قرأت کو آنحضرت صلی اللہ علیہ وسلم کے پیچھے نماز جہری میں، جب سے یہ حدیث سنی آپ صلی اللہ علیہ وسلم سے۔ [موطا امام مالك رواية يحييٰ/حدیث: 191]

سیدنا ابوہریرہ رضی اللہ عنہ سے روایت ہے کہ فرمایا رسول اللہ صلی اللہ علیہ وسلم نے: ”جب امام کہے آمین تو تم بھی آمین کہو، کیونکہ جس کی آمین مل جائے گی ملائکہ کی آمین سے بخش دیے جائیں گے اگلے گناہ اس کے۔“ کہا ابن شہاب نے: اور رسول اللہ صلی اللہ علیہ وسلم ”آمین“ کہتے تھے۔ [موطا امام مالك رواية يحييٰ/حدیث: 192]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب امام « ﴿غَيْرِ الْمَغْضُوبِ عَلَيْهِمْ وَلاَ الضَّالِّينَ﴾ » کہے تو تم آمین کہو، کیونکہ جس کا آمین کہنا برابر ہو جائے گا ملائکہ کے کہنے کے، بخش دئیے جائیں گے اگلے گناہ اس کے۔“ [موطا امام مالك رواية يحييٰ/حدیث: 193]