سیدنا عبداللہ بن عمر رضی اللہ عنہما سے روایت ہے کہ سیدنا عمر بن خطاب رضی اللہ عنہ نے فرمایا: جو لونڈی اپنے مالک سے جنے تو مالک اس کو نہ بیچے نہ ہبہ کرے، نہ وہ مالک کے وارثوں کے ملک میں آ سکتی ہے، بلکہ جب تک مالک زندہ رہے اس سے مزے لے، جب مر جائے وہ آزاد ہو جائے گی۔ [موطا امام مالك رواية يحييٰ/حدیث: 1272]

سیدنا عمر بن خطاب رضی اللہ عنہ کے پاس ایک لونڈی آئی جس کو اس کے مولیٰ نے آگ میں جلایا تھا، آپ رضی اللہ عنہ نے اس کو آزاد کر دیا۔
[موطا امام مالك رواية يحييٰ/حدیث: 1273]

امام مالک رحمہ اللہ نے فرمایا کہ جس شخص پر اتنا قرض ہو کہ سارا مال اس کا قرض میں جا سکے، وہ اگر غلام یا لونڈی کو آزاد کر دے تو درست نہیں۔ اسی طرح نابالغ کو آزاد کرنا اپنے غلام یا لونڈی کا درست نہیں جب تک بالغ نہ ہو جائے، نہ اس کے ولی کو جب تک ولایت اس کی قائم ہے۔ [موطا امام مالك رواية يحييٰ/حدیث: 1273B1]

حضرت عمر بن حکم سے روایت ہے کہ میں رسول اللہ صلی اللہ علیہ وسلم کے پاس آیا اور کہا: یا رسول اللہ صلی اللہ علیہ وسلم ! میری ایک لونڈی بکریاں چرا رہی تھی، جب میں وہاں گیا دیکھا تو ایک بکری گم ہے، میں نے پوچھا: ایک بکری کہاں ہے؟ بولی: اس کو بھیڑیا کھا گیا ہے، مجھے غصہ آیا، آخر میں آدمی تھا، میں نے ایک طمانچہ اس کے منہ پر جڑا۔ میرے ذمّہ ایک بردہ آزاد کرنا واجب ہے، کیا اسی کو آزاد کر دوں؟ آپ صلی اللہ علیہ وسلم نے اس لونڈی سے فرمایا: ”اللہ جل جلالہُ کہاں ہے؟“ وہ بولی: آسمان پر ہے، پھر آپ صلی اللہ علیہ وسلم نے فرمایا: ”میں کون ہوں؟“ بولی: آپ صلی اللہ علیہ وسلم اللہ کے رسول ہیں۔ پھر آپ صلی اللہ علیہ وسلم نے اس شخص کو فرمایا: ”اس کو آزاد کر دے۔“ [موطا امام مالك رواية يحييٰ/حدیث: 1274]

حضرت عبیداللہ بن عبداللہ بن عتبہ بن مسعود سے روایت ہے کہ ایک شخص انصاری رسول اللہ صلی اللہ علیہ وسلم کے پاس کالی لونڈی لے کر آیا اور کہا: یا رسول اللہ صلی اللہ علیہ وسلم ! میرے اوپر ایک مسلمان بردہ آزاد کرنا واجب ہے، کیا میں اس کو آزاد کر دوں؟ اگر آپ صلی اللہ علیہ وسلم کہتے ہیں کہ یہ مؤمنہ ہے تو میں اسی کو آزاد کر دوں۔ آپ صلی اللہ علیہ وسلم نے اس لونڈی سے فرمایا: ”کیا تو یقین کرتی ہے اس بات کا کہ نہیں ہے کوئی معبود سچا سوائے اللہ تعالیٰ کے۔“ وہ بولی: ہاں۔ پھر آپ صلی اللہ علیہ وسلم نے فرمایا: ”کیا تو یقین کرتی ہے اس بات کا کہ محمد صلی اللہ علیہ وسلم اللہ کے رسول ہیں۔“ وہ بولی: ہاں۔ آپ صلی اللہ علیہ وسلم نے فرمایا: ”کیا تو یقین کرتی ہے اس بات کا کہ مرنے کے بعد پھر جی اٹھیں گے۔“ بولی: ہاں۔ تب آپ صلی اللہ علیہ وسلم نے فرمایا: ”اس کو آزاد کر دے۔“ [موطا امام مالك رواية يحييٰ/حدیث: 1275]

سیدنا ابوہریرہ رضی اللہ عنہ سے سوال ہوا کہ جس شخص پر ایک بردہ آزاد کرنا لازم ہو گیا ہو وہ ولدِ زنا کو آزاد کر سکتا ہے؟ جواب دیا: ہاں کر سکتا ہے۔ [موطا امام مالك رواية يحييٰ/حدیث: 1276]

سیدنا فضالہ بن عبید انصاری رضی اللہ عنہ سے روایت ہے کہ ان سے پوچھا گیا: جس شخص پر ایک بردہ آزاد کرنا لازم ہو گیا وہ ولدِ زنا کو آزاد کر سکتا ہے؟ جواب دیا: ہاں، کر سکتا ہے۔ [موطا امام مالك رواية يحييٰ/حدیث: 1277]

سیدنا عبداللہ بن عمر رضی اللہ عنہما سے سوال ہوا کہ جس بردہ کا آزاد کرنا واجب ہو وہ شرط لگا کر خرید کیا جائے؟ کہا: نہیں۔
[موطا امام مالك رواية يحييٰ/حدیث: 1278]

امام مالک رحمہ اللہ نے فرمایا کہ جو شخص غلام کو آزاد کرنے کے لیے، اور اس پر آزاد کرنا واجب ہو، تو اس شرط سے نہ خریدے کہ میں آزاد کردوں گا، اس واسطے کہ اگر اس شرط سے خریدے گا تو بائع رعایت کر کے اس کی قیمت کم کردے گا، اس صورت میں وہ پورا رقبہ نہ ہوگا۔ [موطا امام مالك رواية يحييٰ/حدیث: 1278B1]

کہا امام مالک رحمہ اللہ نے: اگر نفلی طور پر غلام آزاد کرنا چاہے تو آزادی کی شرط لگا کر کر سکتا ہے۔ [موطا امام مالك رواية يحييٰ/حدیث: 1278B2]