سیدنا ابو اسحاق کہتے ہیں کہ میں سیدنا زید بن ارقم رضی اللہ عنہ کے پہلو میں بیٹھا ہوا تھا، ان سے پوچھا گیا کہ نبی کریم صلی اللہ علیہ وسلم نے کتنے غزوے کیے؟ انہوں نے کہا: انیس۔ میں نے پوچھا: آپ حضور صلی اللہ علیہ وسلم کے ساتھ کتنے غزوات میں شریک رہے؟ تو انہوں نے کہا کہ سترہ میں۔ میں نے پوچھا: آپ صلی اللہ علیہ وسلم کا سب سے پہلا غزوہ کون سا تھا؟ کہا کہ «عَسِيْرَةَ» ”عسیرہ“ یا «عُشَيْرَةَ» ”عشیرہ“ (ابواسحاق کہتے ہیں) پھر میں نے اس کا ذکر قتادہ سے کیا تو انہوں نے کہا کہ (صحیح لفظ) «عُشَيْرَةَ» ”عشیرہ“ ہے۔ [اللؤلؤ والمرجان/كتاب الجهاد/حدیث: 1189]

سیدنا بریدہ رضی اللہ عنہ نے بیان کیا کہ وہ رسول اللہ صلی اللہ علیہ وسلم کے ساتھ سولہ غزوات میں شریک تھے۔ [اللؤلؤ والمرجان/كتاب الجهاد/حدیث: 1190]

سیدنا سلمہ بن اکوع رضی اللہ عنہ نے بیان کیا کہ میں نبی کریم صلی اللہ علیہ وسلم کے ہمراہ سات غزووں میں شریک رہا ہوں اور نو ایسے لشکروں میں شریک ہوا ہوں جو آپ صلی اللہ علیہ وسلم نے روانہ کیے تھے (مگر آپ صلی اللہ علیہ وسلم خود ان میں نہیں گئے)، کبھی ہم پر سیدنا ابوبکر رضی اللہ عنہ امیر ہوئے اور کسی فوج کے امیر سیدنا اسامہ رضی اللہ عنہ ہوئے۔ [اللؤلؤ والمرجان/كتاب الجهاد/حدیث: 1191]

سیدنا ابو موسیٰ اشعری رضی اللہ عنہ نے بیان کیا کہ ہم نبی کریم صلی اللہ علیہ وسلم کے ساتھ ایک غزوے کے لیے نکلے۔ ہم چھ ساتھی تھے اور ہم سب کے لیے صرف ایک اونٹ تھا جس پر باری باری ہم سوار ہوتے تھے (پیدل طویل اور پرمشقت سفر کی وجہ سے) ہمارے پاؤں پھٹ گئے، میرے بھی پاؤں پھٹ گئے تھے اور ناخن بھی جھڑ گئے تھے، چنانچہ ہم قدموں پر کپڑے کی پٹیاں باندھ باندھ کر چل رہے تھے۔ اسی لیے اس کا نام «غَزْوَةُ ذَاتِ الرِّقَاعِ» ”پٹیوں والا غزوہ“ پڑا کیونکہ ہم نے قدموں کو پٹیوں سے باندھا تھا۔ سیدنا ابو موسیٰ اشعری رضی اللہ عنہ نے یہ حدیث تو بیان کر دی لیکن پھر انہیں اس کا اظہار اچھا معلوم نہیں ہوا۔ وہ فرمانے لگے کہ مجھے یہ حدیث بیان نہیں کرنی چاہیے تھی، انہیں اپنا نیک عمل ظاہر کرنا برا معلوم ہوا۔ [اللؤلؤ والمرجان/كتاب الجهاد/حدیث: 1192]