حضرت حکم فرماتے ہیں کہ ابو عیاض چھپے ہوئے تھے، عید کے دن حضرت مجاہد ان کے پاس آئے اور انہیں دو رکعات نماز پڑھائی پھر دعا کی۔ [مصنف ابن ابي شيبه/أول العيدين/حدیث: 5929]

حضرت ضحاک فرماتے ہیں کہ جو شخص کسی عذر کی وجہ سے عیدالفطر، عیدالاضحی یا جمعہ کی نماز نہ پڑھ سکے تو وہ چار رکعات پڑھ لے۔ [مصنف ابن ابي شيبه/أول العيدين/حدیث: 5930]

حضرت ابن الحنفیہ کہتے ہیں کہ وہ دو رکعات پڑھے گا۔ [مصنف ابن ابي شيبه/أول العيدين/حدیث: 5931]

حضرت حسن فرماتے ہیں کہ وہ امام کی نماز جیسی نماز پڑھے گا۔ [مصنف ابن ابي شيبه/أول العيدين/حدیث: 5932]

ابراہیم فرماتے ہیں کہ جس کی نماز عید فوت ہوجائے وہ امام کی نماز جیسی نماز پڑھے۔ ابراہیم فرماتے ہیں کہ جب لوگ نماز پڑھ کر واپس آ رہے ہوں تو تم قریب ترین مسجد میں آ کر امام کی نماز ادا کرو اور جو شخص عید کی نماز کے لئے نہ جاسکے وہ بھی امام کی نماز جیسی نماز ادا کرے۔ [مصنف ابن ابي شيبه/أول العيدين/حدیث: 5933]

حضرت حماد فرماتے ہیں کہ جو شخص عید کے دن امام کے ساتھ نماز نہ پڑھ سکے وہ امام کی طرح نماز پڑھے اور اس کی تکبیرات کی طرح تکبیرات کہے۔ [مصنف ابن ابي شيبه/أول العيدين/حدیث: 5934]

حضرت شریک فرماتے ہیں کہ میں نے ابو اسحاق سے اس شخص کے بارے میں سوال کیا جو عید کے دن امام کے نماز سے فارغ ہونے کے بعد آئے تو فرمایا کہ وہ دو رکعات پڑھے۔ [مصنف ابن ابي شيبه/أول العيدين/حدیث: 5935]

حضرت محمد فرماتے ہیں کہ جس شخص کی نماز عید فوت ہوجائے اس کے لیے مستحب ہے کہ وہ امام کی نماز جیسی نماز پڑھے اور جو قرائت امام نے کی ہے وہی قرائت کرے، اگر اسے امام کی قرائت کا علم ہوجائے۔ [مصنف ابن ابي شيبه/أول العيدين/حدیث: 5936]

حضرت حماد فرماتے ہیں کہ جس شخص کی ایک رکعت فوت ہوجائے وہ اس کی قضا کرے اور اس میں وہی اعمال کرے جو امام پہلی رکعت میں کرتا ہے۔ [مصنف ابن ابي شيبه/أول العيدين/حدیث: 5937]

حضرت حسن فرماتے ہیں کہ عید کی نماز میں سے جو رکعت مل جائے اس میں تکبیرات کہے اور جو فوت ہوجائے اس کی قضا اس طرح کرے کہ دوسری رکعت میں امام کی تکبیرات کی طرح تکبیرات کہے۔ [مصنف ابن ابي شيبه/أول العيدين/حدیث: 5938]