حضرت عطاء فرماتے ہیں کہ حضرت ابن زبیر کے زمانے میں عید اور جمعہ ایک ہی دن آگئے۔ انہوں نے لوگوں کو عید کی نماز پڑھائی، پھر جمعہ کے بدلے میں انہیں ظہر کی چار رکعت نماز پڑھائی۔ [مصنف ابن ابي شيبه/أول العيدين/حدیث: 5969]

حضرت عطاء بن سائب کہتے ہیں کہ حجاج کے زمانے میں ایک مرتبہ عید اور جمعہ ایک ہی دن آگئے اس نے دونوں میں سے ایک نماز پڑھائی۔ یہ بات ابو البختری کو معلوم ہوئی تو انہوں نے فرمایا کہ اللہ اسے ہلاک کرے، اسے اس بات کا علم کہاں سے ہوگیا؟ [مصنف ابن ابي شيبه/أول العيدين/حدیث: 5970]

حضرت ابراہیم فرماتے ہیں کہ دونوں میں سے پہلی نماز کافی ہے۔ [مصنف ابن ابي شيبه/أول العيدين/حدیث: 5971]

حضرت عطاء فرماتے ہیں کہ جمعہ اور عید ایک ہی دن آجائیں تو دونوں میں ایک کو ادا کرنا بھی تمہارے لئے کافی ہے۔ [مصنف ابن ابي شيبه/أول العيدين/حدیث: 5972]

حضرت ابن ابی رملہ کہتے ہیں کہ میں نے حضرت معاویہ کو دیکھا کہ انہوں نے حضرت زید بن ارقم رضی اللہ عنہ سے سوال کیا کہ کیا آپ نے رسول اللہ صلی اللہ علیہ وآلہ وسلم کے ساتھ ایسا دن گذارا جس میں جمعہ اور عید ایک ہی دن آئے؟ انہوں نے فرمایا ہاں۔ حضرت معاویہ نے پوچھا کہ اس دن حضور صلی اللہ علیہ وآلہ وسلم کا کیا عمل تھا۔ حضرت زید نے فرمایا کہ حضور صلی اللہ علیہ وآلہ وسلم نے عید کی نماز پڑھائی اور جمعہ کے بارے میں رخصت دے دی اور فرمایا کہ جس کا دِل چاہے پڑھ لے۔ [مصنف ابن ابي شيبه/أول العيدين/حدیث: 5973]

حضرت عطاء بن سائب فرماتے ہیں کہ ایک مرتبہ حجاج کے زمانے میں جمعہ اور عید ایک ہی دن آگئے۔ حجاج نے عید کی نماز پڑھائی اور کہا جو شخص ہمارے ساتھ جمعہ پڑھنا چاہے پڑھے اور جو جانا چاہے چلا جائے۔ چلے جانے میں کوئی حرج نہیں۔ اس پر حضرت ابو البختری اور حضرت میسرہ نے کہا کہ اللہ اسے مارے یہ بات اسے کہاں سے پتا چل گئی۔ [مصنف ابن ابي شيبه/أول العيدين/حدیث: 5974]

حضرت عطاء حضرت علی رضی اللہ عنہ سے روایت کرتے ہیں؛ ان کا قول اگلی روایت میں ابراہیم کے قول کے ساتھ مذکور ہے۔ [مصنف ابن ابي شيبه/أول العيدين/حدیث: 5975]

ابراہیم اور (پچھلی روایت میں) حضرت علی رضی اللہ عنہ دونوں فرماتے ہیں کہ جب عید اور جمعہ ایک ہی دن آجائیں تو دونوں میں سے ایک نماز کافی ہے۔ [مصنف ابن ابي شيبه/أول العيدين/حدیث: 5976]

حضرت زبیر فرماتے ہیں کہ دونوں میں سے ایک نماز کافی ہے۔ [مصنف ابن ابي شيبه/أول العيدين/حدیث: 5977]

حضرت شعبی فرماتے ہیں کہ جب عید اور جمعہ کا دن ایک ہو تو ایک نماز کافی ہے۔ [مصنف ابن ابي شيبه/أول العيدين/حدیث: 5978]