عطاء بن سائب کہتے ہیں کہ میں نے عید الفطر کے دن فجر کی نماز اس مسجد میں ادا کی ہے۔ ابو عبد الرحمن اور عبد اللہ بن معقل جب فجر کی نماز پڑھ لیتے تو عید گاہ کی طرف روانہ ہوجاتے۔ میں بھی ان کے ساتھ چل پڑتا۔ [مصنف ابن ابي شيبه/أول العيدين/حدیث: 5729]

حضرت ابراہیم فرماتے ہیں کہ اسلاف فجر کی نماز عید کے کپڑے پہن کر پڑھتے تھے۔ [مصنف ابن ابي شيبه/أول العيدين/حدیث: 5730]

حضرت ابو مجلز فرماتے ہیں کہ عید الفطر کے دن فجر کی نماز کے بعد تمہیں عید گاہ کی طرف چلے جانا چاہئے۔ [مصنف ابن ابي شيبه/أول العيدين/حدیث: 5731]

حضرت عروہ اس وقت تک عید کی نماز کے لئے نہیں جاتے تھے جب تک سورج بلند نہ ہوجائے۔ [مصنف ابن ابي شيبه/أول العيدين/حدیث: 5732]

حضرت محمد بن علی، عامر اور عطاء فرماتے ہیں کہ عید کی نماز کے لئے اس وقت تک نہ نکلو جب تک سورج طلوع نہ ہوجائے۔ [مصنف ابن ابي شيبه/أول العيدين/حدیث: 5733]

حضرت عیسیٰ بن سھل کہتے ہیں کہ انہوں نے اپنے دادا حضرت رافع بن خدیج اور ان کے بیٹوں کو دیکھا کہ مسجد میں بیٹھے رہتے، جب سورج طلوع ہوجاتا تو دو رکعتیں پڑھ کر عید گاہ کی طرف روانہ ہوجاتے، وہ ایسا عید الفطر اور عید الاضحی دونوں عیدوں میں کیا کرتے تھے۔ [مصنف ابن ابي شيبه/أول العيدين/حدیث: 5734]

حضرت منصور فرماتے ہیں کہ میں عید کے دن صبح کی نماز کے وقت حضرت ابراہیم کے پاس گیا، وہ نماز پڑھ چکے تھے اور ان پر عید کے کپڑے تھے۔ [مصنف ابن ابي شيبه/أول العيدين/حدیث: 5735]

حضرت نافع فرماتے ہیں کہ حضرت ابن عمر رضی اللہ عنہما صبح سویرے عید گاہ کی طرف روانہ ہوتے، بلند آواز سے تکبیر کہتے ہوئے امام کے پاس پہنچ جاتے۔ [مصنف ابن ابي شيبه/أول العيدين/حدیث: 5736]

حضرت محمد بن ابراہیم فرماتے ہیں کہ حضرت ابو قتادہ عید کے دن تکبیر کہا کرتے تھے اور اللہ کا ذکر کرتے تھے۔ [مصنف ابن ابي شيبه/أول العيدين/حدیث: 5737]

حضرت زہری فرماتے ہیں کہ نبی صلی اللہ علیہ وآلہ وسلم عید الفطر کے دن جب عید کے لئے نکلتے تو تکبیر کہتے تھے یہاں تک کہ عید گاہ میں پہنچ جائیں اور نماز مکمل کرلیں، نماز پڑھنے کے بعد تکبیر نہ کہتے تھے۔ [مصنف ابن ابي شيبه/أول العيدين/حدیث: 5738]