حضرت انس سے مروی ہے کہ (میں نے سنا) نبی کریم صلی اللہ علیہ وآلہ وسلم نے حج وعمرہ دونوں کا ایک ساتھ تلبیہ پڑھا، (آپ فرما رہے تھے:) لبیک بحجۃ وعمرۃ معاً (میں حج وعمرہ دونوں کے لیے ایک ساتھ حاضر ہوں)۔ [مصنف ابن ابي شيبه/كتاب الحج/حدیث: 14880]

حضرت انس رضی اللہ عنہ فرماتے ہیں کہ میں نے نبی اکرم (صلی اللہ علیہ وآلہ وسلم) کو فرماتے ہوئے سنا: لبیک بحجۃ وعمرۃ (میں حج اور عمرہ کے لیے حاضر ہوں)۔ [مصنف ابن ابي شيبه/كتاب الحج/حدیث: 14881]

حضرت عبد اللہ بن ابو قتادہ فرماتے ہیں کہ نبی کریم صلی اللہ علیہ وآلہ وسلم نے اس لیے حج قران فرمایا تھا کیونکہ آپ کو بتلا دیا گیا تھا کہ آپ صلی اللہ علیہ وآلہ وسلم اس کے بعد دوبارہ حج نہ فرمائیں گے۔ [مصنف ابن ابي شيبه/كتاب الحج/حدیث: 14882]

حضرت سعید بن المسیب فرماتے ہیں کہ میں نے صحابہ کرام سے سنا وہ حج وعمرہ دونوں کا اکٹھا تلبیہ پڑھتے تھے۔ [مصنف ابن ابي شيبه/كتاب الحج/حدیث: 14883]

حضرت کثیر بن جمھان فرماتے ہیں کہ ہم لوگ حج کے لیے نکلے ہمارے ساتھ اہل جبل کا ایک شخص بھی تھا جس نے پہلے حج نہ کیا ہوا تھا، اس نے حج اور عمرہ کا ایک ساتھ احرام باندھا، ہمارے ساتھیوں نے اس کو معیوب اور ناپسند سمجھا، ہم لوگ حضرت ابن عمر رضی اللہ عنہما کے قریب ہی ٹھہرے، ہم نے ان سے عرض کیا کہ ہمارے ساتھ اہل جبل کا ایک شخص ہے جس نے پہلے حج نہیں کیا ہوا اس نے حج وعمرہ کا ایک ساتھ احرام باندھا ہے اور اس چیز کو ہمارے اصحاب نے معیوب سمجھا ہے اس کا کفارہ کیا ہے؟ آپ نے فرمایا اس کا کفارہ یہ ہے کہ وہ دوگنا اجر وثواب لے کر لوٹے گا اور تم لوگ ایک اجر کے ساتھ۔ [مصنف ابن ابي شيبه/كتاب الحج/حدیث: 14884]

حضرت انس سے مروی ہے کہ نبی کریم صلی اللہ علیہ وآلہ وسلم نے حج وعمرہ کا ایک ساتھ تلبیہ پڑھا۔ [مصنف ابن ابي شيبه/كتاب الحج/حدیث: 14885]

حضرت انس سے اسی طرح مروی ہے۔ [مصنف ابن ابي شيبه/كتاب الحج/حدیث: 14886]

حضرت عائشہ رضی اللہ عنہا فرماتی ہیں کہ ہم نبی کریم صلی اللہ علیہ وآلہ وسلم کے ساتھ نکلے، ہمارا ارادہ صرف حج ہی کا تھا۔ [مصنف ابن ابي شيبه/كتاب الحج/حدیث: 14887]

حضرت عائشہ رضی اللہ عنہا فرماتی ہیں کہ ہم نبی کریم صلی اللہ علیہ وآلہ وسلم کے ساتھ حج کا احرام باندھے ہوئے نکلے۔ [مصنف ابن ابي شيبه/كتاب الحج/حدیث: 14888]

حضرت ابن سیرین فرماتے ہیں کہ نبی کریم صلی اللہ علیہ وآلہ وسلم کے صحابہ کرام نے آپ صلی اللہ علیہ وآلہ وسلم کی وفات کے چالیس سال بعد تک حج افراد کیا، اور وہ لوگ (ابو بکر، عمر، عثمان) آپ کی سنت کی سب سے زیادہ سختی سے پیروی کرنے والے تھے۔ [مصنف ابن ابي شيبه/كتاب الحج/حدیث: 14889]