حضرت ابن سیرین فرماتے ہیں کہ وہ حضرات یہ سمجھتے تھے کہ اگر کوئی خاتون اس طرح حج کرے کہ اس کے پیٹ میں بچہ ہو تو اس کی طرف سے بھی حج ہوجائے گا۔ [مصنف ابن ابي شيبه/كتاب الحج/حدیث: 15541]

حضرت مجاہد فرماتے ہیں کہ کوئی بدو حج کرے تو اس کی طرف سے اسلام کا حج کافی ہوجائے گا۔ [مصنف ابن ابي شيبه/كتاب الحج/حدیث: 15542]

حضرت ابن عباس رضی اللہ عنہما سے مروی ہے کہ مقام روحاء پر کچھ سواروں سے آپ صلی اللہ علیہ وآلہ وسلم کی ملاقات ہوئی، آپ صلی اللہ علیہ وآلہ وسلم نے دریافت فرمایا کہ کون لوگ ہیں؟ انہوں نے عرض کیا کہ مسلمان، پھر انہوں نے پوچھا کہ آپ کون ہیں؟ آپ صلی اللہ علیہ وآلہ وسلم نے ارشاد فرمایا: اللہ کا رسول (صلی اللہ علیہ وآلہ وسلم)! ایک خاتون نے اپنا بچہ بلند کیا اور دریافت کیا کہ کیا اس کا بھی حج ہے؟ آپ صلی اللہ علیہ وآلہ وسلم نے ارشاد فرمایا کہ ہاں اور تیرے لیے بھی اجر ہے۔ [مصنف ابن ابي شيبه/كتاب الحج/حدیث: 15543]

حضرت طاؤس فرماتے ہیں کہ بچہ کا حج کافی ہوجائے گا اس کے لیے یہاں تک کہ وہ بڑا ہوجائے۔ [مصنف ابن ابي شيبه/كتاب الحج/حدیث: 15544]

حضرت ابراہیم فرماتے ہیں کہ بچے کا احرام بھی اسی طرح بنایا جائے گا جس طرح بڑے کا بنایا جاتا ہے اور اس کو خوشبو سے دور رکھا جائے گا اور اس کے ساتھ طواف کیا جائے گا اور اس کو مناسک میں حاضر کیا جائے گا اور اس کی طرف سے تلبیہ پڑھا جائے گا۔ [مصنف ابن ابي شيبه/كتاب الحج/حدیث: 15545]

حضرت عطاء سے بھی اسی طرح منقول ہے، لیکن اس میں اس بات کا اضافہ ہے کہ بچہ کی طرف سے نماز نہ پڑھی جائے اور اگر وہ چاہیں تو اس کو قمیص پہنا دیں اور اگر چاہیں تو نہ پہنائیں۔ [مصنف ابن ابي شيبه/كتاب الحج/حدیث: 15546]

حضرت ابوبکر صدیق نے حضرت عبد اللہ بن زبیر کے ساتھ ایک کپڑے میں طواف کیا۔ [مصنف ابن ابي شيبه/كتاب الحج/حدیث: 15547]

حضرت ابن عمر رضی اللہ عنہما اور حضرت عائشہ رضی اللہ عنہا دونوں حضرات حج میں بچوں کے (سلے ہوئے) کپڑے اتار دیتے اور ان کے ساتھ صفا ومروہ میں چکر لگاتے۔ [مصنف ابن ابي شيبه/كتاب الحج/حدیث: 15548]

حضرت عطاء فرماتے ہیں کہ بچے کو احرام میں ان چیزوں سے اجتناب کروایا جائے گا جن چیزوں سے بڑا اجتناب کرتا ہے، یعنی زینت اور خوشبو دار چیزیں۔ [مصنف ابن ابي شيبه/كتاب الحج/حدیث: 15549]

حضرت جابر ارشاد فرماتے ہیں کہ ہم نے نبی کریم صلی اللہ علیہ وآلہ وسلم کے ساتھ حج کیا اور ہم بچوں کی طرف سے تلبیہ پڑھتے تھے۔ [مصنف ابن ابي شيبه/كتاب الحج/حدیث: 15550]