حضرت ابن عمر رضی اللہ عنہما ارشاد فرماتے ہیں کہ کوئی حرج نہیں کہ جمرات کی رمی کے بعد حلق سے پہلے اگر اپنے سر کو خطمی مٹی سے دھو لے۔ [مصنف ابن ابي شيبه/كتاب الحج/حدیث: 15571]

حضرت عطاء فرماتے ہیں کہ جب آپ کے لیے حلق کروانا حلال ہوگیا ہے تو اپنے سر کو جس مرضی چیز سے دھو لو (کوئی حرج نہیں)۔ [مصنف ابن ابي شيبه/كتاب الحج/حدیث: 15572]

حضرت ابو جعفر ارشاد فرماتے ہیں کہ کوئی حرج نہیں اگر کوئی شخص حلق کروانے سے قبل سر کو دھو لے۔ [مصنف ابن ابي شيبه/كتاب الحج/حدیث: 15573]

حضرت لیث فرماتے ہیں کہ میں نے حضرت عطاء، حضرت طاؤس اور حضرت مجاہد سے دریافت کیا کہ کیا میں حلق کروانے سے قبل اپنا سر دھو سکتا ہوں؟ جب حلق کروانا دشوار ہو رہا ہو؟ ان حضرات نے فرمایا کہ ہاں، اور اگر چاہو تو خطمی مٹی سے بھی دھو لو۔ [مصنف ابن ابي شيبه/كتاب الحج/حدیث: 15574]

حضرت حسن ناپسند فرماتے تھے کہ محرم شخص حلق کروانے سے قبل سر کو خطمی مٹی سے دھوئے۔ [مصنف ابن ابي شيبه/كتاب الحج/حدیث: 15575]

حضرت جابر ناپسند فرماتے تھے کہ محرمہ خاتون جب بال کٹوانے کا ارادہ کرے تو وہ سر کو خطمی مٹی سے دھوئے۔ [مصنف ابن ابي شيبه/كتاب الحج/حدیث: 15576]

حضرت ابن عمر رضی اللہ عنہما حلق کروانے سے قبل سر کو خطمی مٹی سے دھویا کرتے تھے، راوی فرماتے ہیں کہ حضرت عطاء اس کو ناپسند کرتے تھے۔ [مصنف ابن ابي شيبه/كتاب الحج/حدیث: 15577]

حضرت عکرمہ سے مروی ہے کہ ایک شخص نے حضرت ابن عباس رضی اللہ عنہما سے عرض کیا کہ کیا آدمی (ھدی کے) بدنہ اونٹ پر سوار ہوسکتا ہے؟ آپ نے فرمایا کہ بغیر بوجھ ڈالے اس پر ہوسکتا ہے، اس شخص نے عرض کیا کہ اس کا دودھ نکال سکتا ہے؟ آپ نے فرمایا کہ بغیر مشقت میں ڈالے نکال سکتا ہے۔ [مصنف ابن ابي شيبه/كتاب الحج/حدیث: 15578]

حضرت علی رضی اللہ عنہ فرماتے ہیں آدمی اپنے (ھدی کے) اونٹ پر اچھے طریقے سے سوار ہو۔ [مصنف ابن ابي شيبه/كتاب الحج/حدیث: 15579]

حسن فرماتے ہیں کہ جب آدمی کو (ھدی کے) اونٹ پر سوار ہونے کی ضرورت ہو تو اس پر سوار ہوجائے۔ [مصنف ابن ابي شيبه/كتاب الحج/حدیث: 15580]