حضرت ابن عمر رضی اللہ عنہما عرفات سے اس وقت نکلنا بہتر سمجھتے تھے جب رات ظاہر ہوجائے اور روزہ دار روزہ افطار کرلے۔ [مصنف ابن ابي شيبه/كتاب الحج/حدیث: 15871]

حضرت عبد الرحمن بن یزید فرماتے ہیں کہ میں حضرت عبد اللہ کے ساتھ عرفات میں تھا اور لوگوں پر حضرت عثمان امیر تھے، جب سورج غروب ہوا تو حضرت عبد اللہ نے فرمایا اگر امیر المؤمنین اس وقت عرفات سے نکل پڑیں تو وہ سنت کو پالیں گے، پس آپ فوراً چل پڑے۔ [مصنف ابن ابي شيبه/كتاب الحج/حدیث: 15872]

ابراہیم سے مروی ہے کہ وہ حضرات اس بات کو پسند کرتے تھے کہ جب مکہ مکرمہ میں داخل ہوں تو قرآن پاک ختم کیے بغیر وہاں سے نہ نکلیں۔ [مصنف ابن ابي شيبه/كتاب الحج/حدیث: 15873]

حسن سے مروی ہے کہ وہ حضرات جب حج یا عمرہ کے لیے مکہ مکرمہ میں داخل ہوتے تو اس بات کو پسند کرتے کہ جتنا قرآن ان کو یاد ہے اس کو پڑھے بغیر وہاں سے نہ نکلیں۔ [مصنف ابن ابي شيبه/كتاب الحج/حدیث: 15874]

حضرت ابو مجلز اس بات کو پسند کرتے تھے کہ جب کوئی شخص ان تین مسجدوں میں سے کسی مسجد میں جائے تو قرآن پاک پڑھے بغیر وہاں سے نہ نکلے، وہ مسجدیں یہ ہیں، مسجد حرام، مسجد نبوی اور مسجد اقصیٰ (بیت المقدس)۔ [مصنف ابن ابي شيبه/كتاب الحج/حدیث: 15875]

حضرت علقمہ جب مکہ مکرمہ آتے تو قرآن پاک پڑھتے۔ [مصنف ابن ابي شيبه/كتاب الحج/حدیث: 15876]

حضرت ابن عمر رضی اللہ عنہما نے ایک شخص کو سنا کہ وہ طواف کے دوران قرآن پاک پڑھ رہا ہے، آپ نے اس کو منع کردیا۔ [مصنف ابن ابي شيبه/كتاب الحج/حدیث: 15877]

حضرت مجاہد طواف کرتے ہوئے قرآن پاک پڑھنے کو ناپسند کرتے تھے، لیکن وہ اللہ کا ذکر، حمد وثنا اور تکبیر کرتے تھے۔ [مصنف ابن ابي شيبه/كتاب الحج/حدیث: 15878]

حضرت حسن اور حضرت عطاء فرماتے ہیں کہ طواف کے دوران قرآن کریم کی تلاوت کرنا بدعت ہے۔ [مصنف ابن ابي شيبه/كتاب الحج/حدیث: 15879]

حضرت ابراہیم بن نافع فرماتے ہیں کہ میں نے حضرت سعید بن جبیر کے ساتھ ساتھ طواف کیا، آپ دوران طواف اللہ کے ذکر سے نہیں تھکے، (ذکر کرتے رہے)۔ [مصنف ابن ابي شيبه/كتاب الحج/حدیث: 15880]