حضرت ابن عمر رضی اللہ عنہما اونٹنی کے بچہ کو اسی پر سوار کردیتے تھے۔ [مصنف ابن ابي شيبه/كتاب الحج/حدیث: 15911]

حضرت عطاء فرماتے ہیں کہ اونٹنی کے بچہ کو بھی اس کی ماں کے ساتھ ذبح کریں گے۔ [مصنف ابن ابي شيبه/كتاب الحج/حدیث: 15912]

ابراہیم فرماتے ہیں کہ جب اونٹنی کو ذبح کیا جائے گا تو ساتھ میں اس کے بچہ کو بھی ذبح کریں گے۔ [مصنف ابن ابي شيبه/كتاب الحج/حدیث: 15913]

حضرت عطاء نے اس شخص کے متعلق فرمایا جو قربانی کی اونٹنی لے کر جا رہا تھا اور اونٹنی نے راستہ میں بچہ جن دیا اور وہ آدمی اس بچہ کو اٹھا کر نہ لے جا سکا تو فرماتے ہیں اس کے ساتھ جو مرضی کرے، جب مکہ مکرمہ آئے تو اس بچہ کے بدلے مینڈھا ذبح کرے۔ [مصنف ابن ابي شيبه/كتاب الحج/حدیث: 15914]

حضرت ابن جریج فرماتے ہیں کہ میں نے حضرت عطاء سے دریافت کیا کہ کیا آپ امام سے پہلے عرفات سے ہٹتے ہو (جاتے ہو)؟ آپ نے فرمایا کہ نہیں۔ [مصنف ابن ابي شيبه/كتاب الحج/حدیث: 15915]

حضرت ابن عمر رضی اللہ عنہما عرفات سے امام سے قبل ہی چلے گئے تھے۔ [مصنف ابن ابي شيبه/كتاب الحج/حدیث: 15916]

حضرت ابراہیم بن عبد الاعلیٰ فرماتے ہیں کہ ہمارا ایک ساتھی عرفات سے امام سے پہلے ہی چلا گیا، میں نے حضرت مجاہد سے اس کے متعلق دریافت کیا؟ آپ نے فرمایا کہ وہ قربانی کرے، (اس پر قربانی لازم ہے)۔ [مصنف ابن ابي شيبه/كتاب الحج/حدیث: 15917]

حضرت حسن فرماتے ہیں کہ اگر امام سے پہلے عرفات سے چلا گیا تو قربانی لازم ہے۔ [مصنف ابن ابي شيبه/كتاب الحج/حدیث: 15918]

حضرت ابراہیم اس شخص کے متعلق فرماتے ہیں جو مزدلفہ سے چلا جائے اور اس کا خیال ہو کہ یہاں نہیں ٹھہرنا اور وہ منیٰ آجائے تو اس پر قربانی لازم ہے۔ [مصنف ابن ابي شيبه/كتاب الحج/حدیث: 15919]

حضرت ابراہیم اس شخص کے متعلق فرماتے ہیں کہ جو اس بات سے لا علم ہو کہ رات مزدلفہ میں گزارنی ہے تو اس پر قربانی لازم ہے۔ [مصنف ابن ابي شيبه/كتاب الحج/حدیث: 15920]