حضرت عطاء خراسانی فرماتے ہیں کہ میں نے حضرت سعید بن المسیب سے عرض کیا کہ حضرت عکرمہ کہتے ہیں کہ نبی کریم صلی اللہ علیہ وآلہ وسلم نے حالت احرام میں نکاح فرمایا تھا، آپ نے فرمایا: انہوں نے غلط کہا۔ [مصنف ابن ابي شيبه/كتاب الحج/حدیث: 13430]

حضرت زہری فرماتے ہیں کہ محرم نہ نکاح کرے گا نہ ہی نکاح کروائے گا۔ [مصنف ابن ابي شيبه/كتاب الحج/حدیث: 13431]

حضرت عکرمہ فرماتے ہیں کہ حج تمتع کرنے والا روزے نہ رکھے مگر دس دنوں میں۔ [مصنف ابن ابي شيبه/كتاب الحج/حدیث: 13432]

حضرت مجاہد فرماتے ہیں کہ حج تمتع کرنے والا اگر چاہے تو شوال میں روزے رکھ لے اور اگر چاہے تو ذی القعدہ میں رکھ لے۔ [مصنف ابن ابي شيبه/كتاب الحج/حدیث: 13433]

راوی کہتے ہیں کہ حضرت طاؤس اور حضرت عطاء فرماتے ہیں کہ متمتع روزہ نہ رکھے گا مگر دس دنوں میں۔ [مصنف ابن ابي شيبه/كتاب الحج/حدیث: 13434]

حضرت ابن عمر رضی اللہ عنہما فرماتے ہیں کہ تمتع کرنے والا حالت احرام میں ہی روزے رکھے، اور اس کی طرف سے اس کے سوا کچھ کافی نہیں ہوگا راوی کہتے ہیں کہ میں نے عرض کیا وہ شوال میں رکھ سکتا ہے؟ آپ نے فرمایا نہیں، صرف احرام کی حالت میں ہی رکھے۔ [مصنف ابن ابي شيبه/كتاب الحج/حدیث: 13435]

حضرت طاؤس اور حضرت عطاء فرماتے ہیں کہ وہ تین روزے صرف دس دنوں میں ہی رکھے۔ [مصنف ابن ابي شيبه/كتاب الحج/حدیث: 13436]

اور حضرت مجاہد فرماتے ہیں کہ اگر وہ حج کے مہینوں میں رکھ لے تو کوئی حرج نہیں۔ [مصنف ابن ابي شيبه/كتاب الحج/حدیث: 13437]

حضرت عکرمہ فرماتے ہیں کہ اگر اندیشہ ہو کہ مکہ میں روزے نہ رکھ سکے گا تو ایک یا دو روزے راستہ میں رکھ لے۔ [مصنف ابن ابي شيبه/كتاب الحج/حدیث: 13438]

حضرت حسن اس شخص کے بارے میں فرماتے ہیں کہ جو راستہ میں ہو اور اس کو اندیشہ ہو کہ یوم عرفہ سے پہلے نہ پہنچ سکے گا تو وہ تین روزے راستہ میں رکھ لے۔ [مصنف ابن ابي شيبه/كتاب الحج/حدیث: 13439]