حضرت سعید بن جبیر فرماتے ہیں کہ تمتع کرنے والا اگر دس دنوں میں روزے نہ رکھ سکے تو تین روزوں کے بدلے کھانا کھلائے اور جب واپس جائے تو سات روزے رکھے۔ [مصنف ابن ابي شيبه/كتاب الحج/حدیث: 13450]

حضرت عائشہ رضی اللہ عنہا اور حضرت ابن عمر رضی اللہ عنہما فرماتے ہیں کہ تمتع کرنے والے کو ایام تشریق میں روزے رکھنے کی رخصت نہیں دی گئی سوائے اس کے جو ھدی نہ پائے وہ رکھ سکتا ہے۔ [مصنف ابن ابي شيبه/كتاب الحج/حدیث: 13451]

حضرت سالم، حضرت ابن عمر رضی اللہ عنہما سے روایت کرتے ہیں کہ (حضرت عائشہ رضی اللہ عنہا اور حضرت ابن عمر رضی اللہ عنہما) دونوں نے فرمایا: ایام تشریق میں روزے رکھنے کی رخصت نہیں دی گئی سوائے اس شخص کے جو ھدی نہ پائے۔ [مصنف ابن ابي شيبه/كتاب الحج/حدیث: 13452]

حضرت عطاء قرآن پاک کی آیت { وَسَبْعَۃٍ إذَا رَجَعْتُمْ } کے متعلق فرماتے ہیں اگر چاہے تو وہ سات روزے راستہ میں رکھ لے اور اگر چاہے تو مکہ میں رکھ لے۔ [مصنف ابن ابي شيبه/كتاب الحج/حدیث: 13453]

حضرت حسن سات دنوں کے روزوں کے متعلق فرماتے ہیں کہ اگر چاہے تو راستہ میں رکھ لے اور اگر چاہے اپنے گھر واپس جا کر رکھ لے۔ [مصنف ابن ابي شيبه/كتاب الحج/حدیث: 13454]

حضرت مجاہد فرماتے ہیں سات روزے اگر چاہے تو راستہ میں ہی رکھ لے اور اگر چاہے تو گھر جا کر رکھ لے لیکن لگاتار رکھے درمیان میں وقفہ نہ کرے۔ [مصنف ابن ابي شيبه/كتاب الحج/حدیث: 13455]

حضرت مجاہد فرماتے ہیں کہ اگر چاہے تو راستہ میں ہی رکھ لے اور اگر چاہے تو گھر واپس جا کر رکھ لے۔ [مصنف ابن ابي شيبه/كتاب الحج/حدیث: 13456]

حضرت طاؤس قرآن کریم کی آیت { وَسَبْعَۃٍ إذَا رَجَعْتُمْ } کے متعلق فرماتے ہیں کہ اگر چاہے تو الگ الگ دنوں میں رکھ لے لگاتار نہ رکھے۔ [مصنف ابن ابي شيبه/كتاب الحج/حدیث: 13457]

حضرت سعید بن المسیب فرماتے ہیں جو شخص شوال یا ذی القعدہ میں عمرہ کرے پھر وہ وہیں پر رہے اور حج بھی کرلے تو وہ حج تمتع کرنے والا شمار ہوگا اس پر جو میسر ہو وہ ھدی (جانور) لازم ہے اگر ھدی (جانور) نہ پائے تو ایام حج میں تین روزے رکھے اور گھر واپس جا کر سات روزے اور رکھے۔ [مصنف ابن ابي شيبه/كتاب الحج/حدیث: 13458]

حضرت ابن عمر رضی اللہ عنہما حج تمتع کرنے والے پر اونٹ یا گائے ذبح کرنا قرار دیتے ہیں اور اگر وہ نہ پائے تو تین روزے ایام حج میں رکھے اور سات روزے گھر واپس جا کر رکھے۔ [مصنف ابن ابي شيبه/كتاب الحج/حدیث: 13459]