حضرت عائشہ رضی اللہ عنہا محرم کے لیے، مرد ہو یا عورت، زعفران سے رنگے ہوئے کپڑے اور گہرے زرد (عصفر) رنگ کے کپڑے میں احرام باندھنے کو ناپسند کرتی تھیں، ہاں مگر یہ کہ اس کو دھو لیا گیا ہو تو کوئی حرج نہیں۔ [مصنف ابن ابي شيبه/كتاب الحج/حدیث: 13600]

حضرت طاؤس سے دریافت کیا گیا رنگے ہوئے کپڑے کو اتنا دھویا جائے کہ اس کی خوشبو ختم ہوجائے اس کا کیا حکم ہے؟ آپ نے فرمایا اس کپڑے میں احرام باندھنے میں کوئی حرج نہیں۔ [مصنف ابن ابي شيبه/كتاب الحج/حدیث: 13601]

حضرت ابو بشر کہتے ہیں کہ میں نے حضرت جابر بن زید سے دریافت کیا کہ میں نے حالت احرام میں چہرے پر جوں پائی ہے؟ آپ نے فرمایا اس کو اپنے چہرے سے پھینک دے، اس (چہرے) میں اس کا کوئی حصہ نہیں ہے۔ [مصنف ابن ابي شيبه/كتاب الحج/حدیث: 13602]

ایک عورت حضرت ابن عمر رضی اللہ عنہما کے پاس آئی اور عرض کیا کہ اگر میں جوں پاؤں تو اس کو پھینک دوں یا مار دوں؟ آپ نے فرمایا: جوں شکار میں سے نہیں ہے۔ [مصنف ابن ابي شيبه/كتاب الحج/حدیث: 13603]

ایک شخص نے حضرت عطاء سے دریافت کیا کہ جوں میرے اوپر رینگے تو اس کو پھینک دوں؟ آپ نے فرمایا: ہاں، اس شخص نے عرض کیا: میں جو ؤں کو ڈھونڈ کر مار دوں؟ آپ نے فرمایا کہ حالت احرام میں کپڑوں سے جو ؤں کو ڈھونڈ کر مارنے کو ناپسند کیا گیا ہے، راوی کہتے ہیں کہ میں نے عرض کیا کہ چچڑی اور جوں اگر میرے اوپر رینگے تو کیا کروں؟ آپ نے فرمایا جو چیز تیرے جسم کا حصہ نہیں اس کو اپنے سے دور پھینک دے۔ [مصنف ابن ابي شيبه/كتاب الحج/حدیث: 13604]

حضرت عکرمہ بن خالد المخزومی سے دریافت کیا گیا کہ اگر محرم کپڑوں پر جو ؤیں دیکھے تو؟ آپ نے فرمایا: اس کو آرام سے پکڑ کر زمین پر رکھ دے لیکن خود جو ؤیں تلاش نہ کرے۔ [مصنف ابن ابي شيبه/كتاب الحج/حدیث: 13605]

حضرت عطاء فرماتے ہیں کہ اگر محرم چاہے تو اپنے اوپر سے جوں پھینک دے۔ [مصنف ابن ابي شيبه/كتاب الحج/حدیث: 13606]

حضرت معتمر کے والد فرماتے ہیں کہ میری ساتھ چیچڑی چمٹ گئی میں حالت احرام میں تھا، میں نے حضرت طلق بن حبیب سے دریافت کیا؟ آپ نے فرمایا اس کو پھینک دے اللہ تعالیٰ چچڑی کو تجھ سے دور کرے۔ [مصنف ابن ابي شيبه/كتاب الحج/حدیث: 13607]

حضرت جابر سے مروی ہے کہ نبی کریم صلی اللہ علیہ وآلہ وسلم نے حجۃ الوداع کے موقع پر سواری پر سوار ہو کر طواف فرمایا اور خم دار لکڑی سے حجر اسود کا استلام فرمایا۔ [مصنف ابن ابي شيبه/كتاب الحج/حدیث: 13608]

حضرت عکرمہ سے مروی ہے کہ نبی کریم صلی اللہ علیہ وآلہ وسلم نے اونٹ پر سوار ہو کر بیت اللہ کا طواف کیا، جب بھی حجر اسود کے پاس سے گزرتے تو اس کی طرف اشارہ فرماتے۔ [مصنف ابن ابي شيبه/كتاب الحج/حدیث: 13609]